Covid-19-ի դեմ պատվաստման արդյունքում վարակման ռիսկը նվազում է 3.8 անգամ. մասնագետ
Հայաստանում ուսումնասիրության համաձայն՝ կորոնավիրուսի դեմ պատվաստման արդյունքում վարակման ռիսկը նվազում է 3.8 անգամ: «Արմենպրես»-ի հաղորդմամբ՝ այս մասին լրագրողների հետ հանդիպմանն ասաց Առողջապահության նախարարության ՀՎԿԱԿ-ի գլխավոր տնօրենի տեղակալ, Իմունականխարգելման ազգային ծրագրի ղեկավար Գայանե Սահակյանը:
Նախարարությունը գնահատել է, թե Հայաստանում վարակման հաճախականությունն ինչպիսի՞ն է պատվաստվածների և չպատվաստվածների շրջանում, և թե պատվաստման արդյունքում վարակման ռիսկը որքանով է նվազում:
«Ըստ մեր գնահատումների՝ դեկտեմբերի 22-ի դրությամբ չպատվաստվածների շրջանում վարակման ռիսկը կազմում է 0.39 տոկոս, յուրաքանչյուր 337-րդ դրական դեպքը չպատվաստված անձ է, որը ենթակա է վարակման ռիսկի: 2 դեղաչափ պատվաստված անձանց շրջանում վարակման ռիսկը կազմում է 0.08 տոկոս. յուրաքանչյուր 1290-րդ պատվաստված անձը ենթակա է վարակման ռիսկի: Այսպիսով, պատվաստման արդյունքում մեր վարակման ռիսկը նվազում է 3.8 անգամ»,-ասաց Սահակյանը:
Նրա խոսքով՝ չպատվաստված անձանց շրջանում 0.09 տոկոսով կա ռիսկ, կամ, յուրաքանչյուր 1379-րդ չպատվաստված անձը, եթե հիվանդանա վիրուսով, ենթակա կլինի հոսպիտալացման: Իսկ 2 դեղաչափ պատվաստված անձանց շրջանում ռիսկը 0.01 տոկոս կամ յուրաքանչյուր 11413-րդ պատվաստված անձը ենթակա է հոսպիտալացման ռիսկի: «Եթե համադրում ենք այս երկու ռիսկերը, ունենում ենք, որ ամբողջական պատվաստումը 7.5 անգամ պաշտպանում է հոսպիտալացման ռիսկից»,-ասաց մասնագետը:
Չպատվաստվածների 0.01 տոկոսը կամ յուրաքանչյուր 13867-րդ չպատվաստված անձը մեծ ռիսկայնության գոտում է, այսինքն՝ ռեանիմացիայում հայտնվելու: Իսկ 2 դեղաչափ ստացածների շրջանում հոսպիտալացման ռիսկը 0.0011 տոկոս է կամ յուրաքանչյուր 94568-րդ պատվաստված անձը: Համադրության դեպքում կստացվի, որ երկու դեղաչափ ստացածների մոտ ռիսկը 6.8 անգամ նվազ է՝ չպատվաստված մարդու համեմատությամբ: Փոքր է հավանականությունը, որ ինքը ծանր կլինիկական ընթացքով կհայտնվի ռեանիմացիայում:
Անդրադառնալով արձանագրված տվյալներին՝ Սահակյանը տեղեկացրեց, որ Հայաստանում վարակվել է առաջին դեղաչափ ստացած անձանց 1.3 տոկոսը, երկրորդ դեղաչափ ստացածների 1.2 տոկոսը, իսկ 2-րդ դեղաչափը ստացածների 1.1 տոկոսը 14 օր հետո վարակվել է:
Ընդ որում, պատվաստման ենթակա բնակչության 40.8 տոկոսն է ստացել առաջին դեղաչափը, երկրորդ դեղաչափը՝ մոտ 30 տոկոսը:
Ամբողջական պատվաստված ու հետո վարակված անձանցից հոսպիտալացվել է 0.12 տոկոսը, իսկ վերակենդանացման բաժանմունքում է հայտնվել 0.011 տոկոսը: Ըստ Սահակյանի՝ դա չնչին տոկոս է:
