Եթե Պապիկյան Սուրենի փոխարեն Աղազարյան Հովիկին նշանակեին՝ ոչինչ չէր փոխվելու. պարտված խաղում որքան ուզում եք՝ ֆիգուրներ փոխեք. Արտակ Զաքարյան
«Պրեսսինգ» հաղորդաշարում Սաթիկ Սեյրանյանի հյուրը ՀՀԿ խորհրդի անդամ, ՀՀ պաշտպանության նախարարի նախկին առաջին տեղակալ Արտակ Զաքարյանն է։
Բանախոսը համոզված է.
- Այսօրվա իրավիճակի աբսուրդներից մեկն այն է, որ մենք պետք է գլխի ընկնենք՝ որքան զոհ, որքան վիրավոր, գերեվարված, անհետ կորած կա՝ համադրելով տարբեր աղբյուրների տվյալները:
- Մութ ու կասկածելի է թվում 24 անհետ կորածների հանգամանքը, պատճառները կարող են բազմաթիվ լինել, բայց հիմնական պատճառը քաղաքականությունն է, որն իրականացնում է այս կապիտուլյանտ իշխանությունը:
- Եթե Պապիկյան Սուրենի փոխարեն Աղազարյան Հովիկին նշանակեին՝ ոչինչ չէր փոխվելու Հայաստանի, ՀՀ քաղաքացու, բանակի կյանքում: Մինչև Նիկոլը չհեռացվի իշխանությունից, մնացած բոլոր վարկածները պարտված խաղեր են, իսկ պարտված խաղում որքան ուզում եք՝ ֆիգուրներ փոխեք…
- Ակնհայտ է, որ ՀՀ վարչապետ կոչեցյալը շահերի համադրման փոխարեն՝ գնում է շահերի հակադրման ճանապարհով:
- Ակնհայտ է, որ այս իշխանությունների կողմից ինչ-որ հանձնարարություն է կատարվում, օրինակ՝ երեկ պառլամենտում պատգամավորները միանգամից ակտիվանում են նոր տրամադրություններ սերմանելու նպատակով… Մեր սահմանների անվտանգային անձեռնմխելիությունը դեռևս չլուծած՝ իշխանական պատգամավորներն իրար հերթ չտալով ելույթներ են ունենում՝ մեկն ասում է՝ ՆԱՏՕ, մեկը՝ ՄԱԿ-ի Անվտանգության խորհուրդ, երրորդը՝ ՀԱՊԿ…
- Նիկոլ, պարտվել ես, մի կողմ քաշվիր, որովհետև հիմա ինչ ասես կարող են անել, թշնամին թույլ կետը բռնել է և ոնց ուզում՝ ստորացնում է… տուժում է երկիրը, քաղաքացին:
- Լաչինի միջանցքի հարցը Նիկոլի շնորհիվ հաջորդ կառավարությունների գլխացավանքն է լինելու:
- Նիկոլը մինչև վերջ չի մնալու, դա ինքն էլ լավ գիտի:
- Նիկոլի ձեռքով բանակցային գործընթացը այնպես է շեղվել, որ Թուրքիան ևս ուզում է մտնել այդ վերահսկողությունն իրականացնելու գործընթացների մեջ, Ռուսաստանն ու Իրանը դեմ են:
- Նոր ստեղծված իրավիճակում Նիկոլը ճանապարհներ է փնտրում, որ Թուրքիայի և Ադրբեջանի համար ճանապարհ տա. դա լինելու է միջանցք, որը մի փաստաթղթով պետք է սահմանվի:
- Ռուսաստանի և Իրանի համար միջանցք հասկացությունն անընդունելի է: Թուրքիան և Ադրբեջանը Հայաստանին ասում են՝ եթե միջանցք չտաք՝ ուժով կվերցնենք:
- Կապիտուլյանտի թիմակիցները ՄԱԿ-ին դիմում են, որպեսզի աշխարհին ցույց տան, որ ՀԱՊԿ գոյություն չունի այլևս:
- Երբ չկա բովանդակություն, ձևը նշանակություն չունի. եթե չունես պետություն, ի՞նչ նշանակություն ունի՝ ժողովրդավա՞ր ես, թե՞ ավտորիտար:
- 2018-ին սրանց իշխանության բերեցին նաև այն քաղաքական ուժերը, որոնք ընդդիմության շարքերում իրենց դեմ են պայքարում:
- Նիկոլն ուզում է պայմանավորվածությունները կատարել, բայց այնպես, որ և՛ իր աթոռը պահպանի, և՛ ժողովուրդը չընդվզի:
- Ալիևը ձգտում է պոկել առավելագույնը, իսկ Թուրքիայի և Ադրբեջանի համար միջանցք հասկացությունը պարտադիր է:
- Հայաստանի սահմաններին պատերազմ անելու թատրոնը՝ զոհերի և կորուստների գնով, վերջում հանգեցնելու է նրան, որ Փաշինյանը կարողանա հայտարարել՝ ստեղծված իրավիճակում ստորագրելու եմ ինչ-որ փաստաթուղթ, որ նոր զոհեր չլինեն:
- Նիկոլը Հայաստանի տարածքը վերածել է աշխարհաքաղաքական շահերի հակադրությունների դաշտի:
- Մեր ժողովուրդը, Նիկոլի հետ միասին, իրեն դրել է Ռուսաստանից կախյալ վիճակում:
