Թուրքմենստանի գյուղատնտեսության նախարար Ռեջեփ Բազարովին Հայաստանում է
ՀՀ գյուղատնտեսության նախարար Սերգո Կարապետյանը երեկ ընդունել է պաշտոնական այցով Երևան ժամանած Թուրքմենստանի նախագահ Գուրբանգուլի Բերդիմուհամեդովի գլխավորած պատվիրակության կազմում ընդգրկված Թուրքմենստանի գյուղատնտեսության նախարար Ռեջեփ Բազարովիին և Թուրքմենստանի Վերամշակող արդյունաբերության ասոցիացիայի նախագահ Վալի Վալիևիին:
Այս մասին այօր 168.am-ի հետ զրույցում ասաց ՀՀ գյուղատնտեսության նախարարության մամլո խոսնակ Անի Սմբատյանը:
«Հանդիպման ժամանակ ՀՀ գյուղնախարար Սերգո Կարապետյանը պատվիրակությանը հակիրճ ներկայացրել է ՀՀ գյուղատնտեսության արդի վիճակը և նշել, որ ՀՀ կառավարությունը գյուղատնտեսությունը հռչակել է տնտեսության գերակա ճյուղ:
Իսկ Թուրքմենստանի գյուղատնտեսության նախարար Ռեջեփ Բազարովը շնորհակալություն է հայտնել հանդիպման համար, ներկայացրել է Թուրքմենստանում գյուղատնտեսության առկա վիճակը և նշել , որ իրենք ևս պատրաստակամ են համագործակցություն ծավալել ՀՀ գյուղատնտեսության նախարարության հետ»,- մեզ հետ զրույցում ասաց Անի Սմբատյանը:
Նշենք, որ այսօր կստորագրվեն «ՀՀ կառավարության և Թուրքմենստանի կառավարության միջև անասնաբուժության բնագավառում համագործակցության մասին» և «ՀՀ գյուղատնտեսության նախարարության և Թուրքմենստանի գյուղատնտեսության նախարարության միջև համագործակցության մասին» համաձայնագրերը:
