Արցախի ՄԻՊ-ը ներկայացրել է Ադրբեջանի ագրեսիայի հետևանքով կրած կորուստների մանրամասները
Արցախի Մարդու իրավունքների պաշտպան Արտակ Բեգլարյանը ներկայացրել է ադրբեջանական ագրեսիայի հետևանքով քաղաքացիական անձանց շրջանում կորուստների վերաբերյալ մանրամասներ:
Բեգլարյանը գծապատկերով նախ ներկայացրել է սեպտեմբերի 29-ից հոկտեմբերի 7-ը ներառյալ Ադրբեջանի սանձազերծած գործողությունների հետևանքով զոհված, ինչպես նաև տուժած անձանց բնակավայրերի քարտեզը (քարտեզում նշված են միայն լուրջ վիրավորումները): Ընդհանուր առմամբ զոհվել է 20, վիրավորվել 93 քաղաքացի:
Ստեփանակերտ – 7 զոհ, 36 վիրավոր
Մարտունի – 6 զոհ, 13 վիրավոր
Մարտակերտ – 3 զոհ, 2 վիրավոր
Ալաշան – 1 զոհ, 3 վիրավոր
Հադրութ – 1 զոհ, 3 վիրավոր
Այգեստան – 1 զոհ
Մեծ Շեն – 1 զոհ
Մաղավուզ – 6 վիրավոր
Տաղասեր – 3 վիրավոր
Ն. Հոռաթաղ – 2 վիրավոր
Քարվաճառ – 2 վիրավոր
Մատաղիս – 1վիրավոր
Սպիտակ Շեն – 1 վիրավոր
Վարդաշատ – 1 վիրավոր
Սպանված քաղաքացիական անձանցից 12-ը եղել են արական սեռի ներկայացուցիչ, 8-ն իգական: Նրանցից 12-ը մահացել են բնակության վայրում, 1-ն աշխատանքի, մյուս 7-ն էլ հասարակական այլ վայրերում:
Վիրավորում ստացածներից 60-ն արական սեռի ներկայացուցիչ են, իսկ 13-ն՝ իգական: 37 հոգի լուրջ վիրավորում է ստացել իր բնակության վայրի մոտ, 6-ն անվտանգ վայր տեղափոխվելիս, 7-ն աշխատանքի վայրում, 23-ը հասարակական այլ վայրերում:
Ադրբեջանական ագրեսիայի հետևանքով քաղաքացիական մի շարք օբյեկտների հասցվել են նյութական վնասներ:
Վնասվել է 4600 մասնավոր անշարժ գույք, 430 մասնավոր շարժական գույք, 750 ենթակառուցվածք, հանրային և արտադրական նշանակության օբյեկտ:
