Արմեն Գրիգորյանը հանդիպել է Ուզբեկստանի ԱԽ քարտուղար Մահմուդովի հետ
ԱՊՀ անվտանգության խորհուրդների քարտուղարների հերթական՝ 7-րդ հանդիպմանը մասնակցելու նպատակով ՌԴ մայրաքաղաք Մոսկվայում գտնվող ՀՀ ԱԽ քարտուղար Արմեն Գրիգորյանը նոյեմբերի 20-ին հանդիպել է ունեցել Ուզբեկստանի ԱԽ քարտուղար Վիկտոր Մահմուդովի հետ։ Այս մասին տեղեկացրին ՀՀ անվտանգության խորհրդից։
«Սա Հայաստանի և Ուզբեկստանի ԱԽ քարտուղարների միջև երբևէ տեղի ունեցած առաջին հանդիպումն էր։ Այս փաստն արձանագրեց նաև քարտուղար Գրիգորյանը, ով հանդիպման մեկնարկին արձանագրեց հայ-ուզբեկական հարաբերությունների դրական դինամիկան՝ մասնավորապես կարևորելով Հայաստանի առաջին դեսպանի նշանակումը և երկրների ղեկավարների հանդիպումը։
Քարտուղար Գրիգորյանը կարևորեց նաև Ուզբեկստանում գործող հայ համայնքի դերը երկու երկրների բարիդրացիական հարաբերությունների զարգացման գործում։
Քարտուղար Մահմուդովը ընգծեց երկու երկրների հարաբերությունների իրավական բազան ու տնտեսական բաղադրիչը զարգացնելու անհրաժեշտությունը։ Նա նաև հայտնեց, որ ուզբեկական կողմը հետաքրքրված է կիբերանվտանգության, ռազմական կրթության և տեղեկատվական տեխնոլոգիաների ոլորտներում համագործակցության զարգացմամբ։
Հանդիպման ընթացքում քննարկվել են երկու երկրների ԱԽ գրասենյակների միջև համագործակցության հաստատութենականացման և ռազմաարդյունաբերության ոլորտում համագործակցության նոր հնարավորությունները:
Հանդիպման ավարտին ԱԽ քարտուղարները փոխադարձ կերպով միմյանց հրավիրեցին կատարելու պաշտոնական այցեր»,- նշված է հաղորդագրության մեջ։
