Boeing 737-ը ամենավաճառվող ինքնաթիռի կարգավիճակը զիջել է Airbus A320-ին. Business Insider
Boeing 737-ը կորցրել է աշխարհում ամենավաճառվող ինքնաթիռի կարգավիճակը՝ այն զիջելով իր մրցակցին՝ Airbus ընկերության A320-ին: Այդ մասին հայտնել է Business Insider պորտալը՝ վկայակոչելով ընկերությունների հաշվետվությունները։
Նրա տվյալներով՝ հոկտեմբերի վերջին տարբեր վերափոխակների Boeing 737-ի համար գրանցվել է 15 հազար 136 պատվեր, իսկ A320-ի շարքի համար՝ 15 հազար 193: Նշվում է, որ Airbus-ը մրցակցին մոտենում էր վերջին մի քանի տարվա ընթացքում եւ խզումը հատկապես կրճատվել է, երբ Airbus-ը ներկայացրել է A320 neo մոդելը: Այդուհանդերձ, 2018 թվականի վերջին A320 ինքնաթիռները Boeing 737-ին զիջում էին 400 պատվերով:
Պորտալի կարծիքով, ֆրանսիական կորպորացիայի կողմից ամերիկյան իր մրցակցից առաջ անցնելու հիմնական պատճառը դարձել է այն իրադրությունը, որն ստեղծվել է երկու Boeing 737 MAX 8-երի կործանման կապակցությամբ: Այս տարվա մարտի 10-ին Եթովպիայում կործանվել է Ethiopian Airlines ավիաընկերության ինքնաթիռը, ինչի հետեւանքով զոհվել է 157 մարդ, իսկ 2018 թվականի հոկտեմբերի 29-ին Ինդոնեզիայում Lion Air ընկերության համանման մոդելի ինքնաթիռի վթարի հետեւանքով զոհվել է 189 մարդ: Դրանից հետո բազմաթիվ երկրներ, ներառյալ Ռուսաստանը, ԱՄՆ-ը եւ ԵՄ-ի պետությունները, անվտանգության նկատառումներից ելնելով, դադարեցրել են այդ շարքի ինքնաթիռների շահագործումը:
Business Insider-ը նշում է, որ 737 մոդելի պատվերների թիվը կարող է աճել հաջորդ տարվանից, քանի որ սպասվում է, որ մինչեւ հունվար այդ շարքի ինքնաթիռները կարող են ստանալ հավաստագիր, որը թույլ կտա վերսկսել թռիչքները, հաղորդել է ՏԱՍՍ-ը:
