«Արայիկ Հարությունյանը ներդրված «տրոյական ձի» է». Արծվիկ Մինասյան
ՀՀ Կրթության, գիտության, մշակույթի և սպորտի (ԿԳՄՍ) նախարար Արայիկ Հարությունյանը չի գիտակցում իր պարտականությունները:
Այս մասին լրագրողների հետ հանդիպմանը հայտարարեց ՀՅԴ ԳՄ անդամ Արծվիկ Մինասյանը՝ հիշեցնելով, որ նրա ղեկավարած նախարարության գործառույթը լեզվի, ժողովրդի հոգևոր և մտավոր ներուժի ամրապնդմանը և ազգային ինքնության զարգացմանն ուղղված քաղաքականության մշակումն է: Այսինքն՝ գործում է հակաօրինական ընթացքով:
«Այս մարդը ոչ միայն չի տիրապետում իրավիճակին, այլև կանխամտածված օտարածին օրակարգի սպասարկում է իրականացնում՝ մեր ժողովրդին, երիտասարդությանը կտրել ազգային ինքնությունից: Արայիկ Հարությունյանը «տրոյական ձի» է Հայաստանի համար, որը ներդրվել է ՀՀ ինքնատիպությունը քանդելու համար»,- նշեց նա:
Անդրադառնալով Արայիկ Հարությունյանի կողմից հնչող սպառնալիքներին՝ քրեական գործերի և արկղեր լցնելու մասին, Արծվիկ Մինասյանը հրապարակային հայտարարեց՝ ԿԳՄՍ նախարարը Քրեական օրենսգրքով ենթակա է պատասխանատվության:
«Թող հոդվածն ինքը որոշի: Բայց առնվազն երկու հոդված այստեղ կա. կամ սուտ մատնության հոդվածն է, երբ հանցագործության մասին սուտ մատնություն է իրականացնում անձը՝ գիտակցելով, որ իր տրամադրած տեղեկատվությունը կեղծ է, կամ հանցագործություն է պարտակում: Հակառակ դեպքում՝ Հարությունյանի արտահայտած այս սպառնալիքներն ունեն մեկ կարևոր նպատակ՝ քաղաքական շանտաժի միջոցով փորձել անել այնպես, որ իբր իրավական մեղադրանքների տարափ տեղա: Փառք Աստծո, այսօր Քրեական օրենսգիրքը գործում է, կոնկրետ երկու հոդված կա, և կրկնում եմ՝ Արայիկ Հարությունյանն իր արտահայտած մտքերի համար պետք է պատասխանատվության ենթարկվի»,- ընդգծեց Մինասյանը:
Մարիամ Պետրոսյան
