«Մի փոքր վրիպակ էր գնացել». Նոնա Նավիկյան

««Հոկտեմբերի 27»-ի գործով ցմահ ազատազրկման դատապարտված ևս 2 բանտարկյալ՝ Դերենիկ Բեջանյանն ու Աշոտ Կնյազյանը դեռ 2017 թվականին են դիմել պայմանական վաղաժամկետ ազատ արձակման համար»,- այս մասին 168.am-ին երեկ ասել է Քրեակատարողական ծառայության հանրային կապերի բաժնի պետ Նանա Նավիկյանը՝  հերքելով այսօր Sputnik Արմենիային տված իր տեղեկությունը:

Նավիկյանը Sputnik Արմենիային հայտնել էր, որ «Հոկտեմբերի 27»-ի գործով ցմահ ազատազրկման դատապարտված Կարեն Հունանյանը, ինչպես նաև հանցախմբի ցմահ դատապարտված 2 անդամները՝ Դերենիկ Բեջանյանն ու Աշոտ Կնյազյանը, ովքեր շարունակում են կրել պատիժը, պայմանական վաղաժամկետ ազատ արձակման համար, չեն դիմել։

Դատապարտյալների՝ պայմանական վաղաժամկետ ազատմանը դիմելու հնարավորության ու ընթացակարգերի մասին տեղեկություն ստանալու համար 168.am-ը խոսեց ՔԿԾ հանրային կապերի բաժնի պետ Նոնա Նավիկյանի հետ: Պարզվեց, որ «Sputnik Արմենիա»-ի հոդվածում վրիպակ է եղել, ու ըստ Նավիկյանի, դեռ չի շտկվել:

«Sputnik Արմենիային» ասված էր, այնտեղ մի փոքր վրիպակ էր գնացել, ըստ երևույթին իրենք չեն շտկել դեռ: Վրիպակ էր գնացել: Այնտեղ ինքը գրել էր, որ չեն դիմել, չեն դիմել՝ նկատի ուներ նախկինում»,-ասաց Նավիկյանը:

Պարզվում է, որ «Հոկտեմբերի 27»-ի գործով ցմահ ազատազրկման դատապարտված հանցախմբի անդամներից երկուսը՝ Դերենիկ Բեջանյանն ու Աշոտ Կնյազյանը պայմանական վաղաժամկետ ազատ արձակման համար դիմել են դեռ 2017 թվականին, բայց ստացել են բացասական եզրակացություն:

«2017-ին Դերենիկ Բեջանյանը դիմել էր պայմանական վաղաժամկետի համար: Սակայն անկախ հանձնաժողովը բացասական եզրակացություն էր տվել: Դրանից հետո նա կարող էր ևս դիմել: 2019 թվականին էլ է դիմել վաղաժամկետ ազատման համար, սակայն կրկին բացասական եզրակացություն: Աշոտ Կնյազյանը նույնպես 2017թվականին դիմել է վաղաժամկետ ազատման, նա նույնպես ստացել է բացասական եզրակացություն: Բայց 2019 թվին ինքը չի դիմել: Բեջանյանը դիմել է 2019 թվին, որը ստացել է ևս բացասական եզրակացություն, իսկ Կնյազյանը՝ ոչ, չի դիմել, իրավունք ունի դիմելու»,-ասել էր Նավիկյանը:

Կարեն Հունանյանի՝ պայմանական վաղաժամկետ ազատ արձակման մասով Նավիկյանը 168.am-ին ասաց, որ նա առհասարակ չի դիմել:

Հիշեցնենք, որ «Հոկտեմբերի 27»-ի գործով ահաբեկչական խմբավորման ղեկավար Նաիրի Հունանյանը, որը դատապարտված է ցմահ ազատազրկման և իր պատիժը կրում է «Երևան Կենտրոն» քրեակատարողական հիմնարկում, 2019 թվականի սեպտեմբերի 11-ին դիմել էր վաղաժամկետ ազատ արձակման խնդրանքով:

Դիմումի պատասխանը կտրվի մինչև 2019 թվականի դեկտեմբերի 1-ը:

ԱՔՍԱՆՆԱ ՀԱՅՐԱՊԵՏՅԱՆ