«Հայ ավանդական ընտանիքը, Հայ առաքելական եկեղեցին և ազգային պետությունը անփոխարինելի արժեքներ են ինձ համար». Թագուհի Թովմասյան
ԱԺ «Իմ քայլը» խմբակցության պատգամավոր Թագուհի Թովմասյանը ֆեյսբուքյան իր էջում անդրադարձել է «Կանանց դեմ բռնության և ընտանեկան բռնության կանխարգելման և դրա դեմ պայքարի» ԵԽ՝ «Ստամբուլյան» կոնվենցիային։
«Սիրելի լրագրողներ, որպեսզի անհատական բոլորիդ զանգերին ու նամակներին չպատասխանեմ ու կրկնվեմ, որոշեցի այսպես փոխանցեմ ասելիքս.
այսօր ԱԺ «Իմ քայլը» խմբակցության նիստին չեմ մասնակցել և չգիտեմ, թե ինչ մանրամասներ են խոսվել ՀՀ արդարադատության նախարարի հետ «Կանանց դեմ բռնության և ընտանեկան բռնության կանխարգելման և դրա դեմ պայքարի» ԵԽ կոնվենցիայի կամ այսպես ասած՝ «Ստամբուլյան» կոնվենցիայի մասին:
Ի սկզբանե հայտնել էի դիրքորոշումս, որ սկզբունքային անհամաձայնություններ ունեմ Կոնվենցիայի որոշ դրույթների հետ. Իհարկե, բռնությունն անընդունելի է, և ես իմ կյանքի մեծ մասը պայքար եմ տարել բռնության ամենատարբեր դրսևորումների դեմ: Շատ հաճախ զրկանքների գնով լրագրության տարիներին պայքարել եմ մարդկանց իրավունքների պաշտպանության համար: Բայց այս կոնվենցիայի մեջ կան դրույթներ, որոնք ինձ պարտադրում են ևս մեկ անգամ հայտարարելու, որ հայկական ավանդական ընտանիքը, Հայ առաքելական եկեղեցին և ազգային պետությունը անփոխարինելի արժեքներ են ինձ համար:
Իհարկե, փաստարկները բազմաթիվ են. միայն մի մեջբերում անեմ. կոնվենցիայի
12-րդ հոդվածի 1-ին մասի համաձայն՝ «մասնակից պետությունները պետք է անհրաժեշտ միջոցներ ձեռնարկեն՝ կանանց և տղամարդկանց վարքագծի սոցիալական և մշակութային վարվելակերպերում փոփոխություններ մտցնելու նպատակով՝ այն հաշվով, որպեսզի արմատախիլ արվեն այն նախապաշարմունքները, սովորույթները, ավանդույթները և մյուս բոլոր այն երևույթները, որոնք հիմնված են կանանց և տղամարդկանց կարծրատիպային դերաբաժանման գաղափարի վրա»։
«Կանանց և տղամարդկանց կարծրատիպային դերաբաժանում» ասվածը հասկանալու համար պետք է նայել նույն կոնվենցիայի 4-րդ հոդվածում օգտագործվող «գենդերային ինքնություն» ձևակերպումը և կոնվենցիայի բացատրական զեկույցը, որը կրում է իմպերատիվ բնույթ, 53-րդ կետով սահմանում է՝ «…Նույն ձևով ընտանեկան բռնության ենթարկված գեյերը, լեսբուհիները և բիսեքսուալները իրենց սեռական կողմնորոշման պատճառով հաճախ չեն օգտվում աջակցման ծառայություններից: Այս խմբի անձինք կարող են նույնպես խտրականության ենթարկվել իրենց գենդերային կողմնորոշման հիմքով, ինչը նշանակում է, որ այն գենդերը, որի հետ նրանք իրենց նույնացնում են, չի համապատասխանում ծննդյան փաստով նրանց կենսաբանական սեռի հետ: Սա ներառում է այնպիսի կատեգորիաներ, ինչպիսիք են տրանսգենդերը, տրանսֆիստիտը կամ տրանսեքսուալ և այլ անձը, որը չի համապատասխանում հասարակության կողմից «կին» և «տղամարդ» կատեգորիաներին ներկայացվող պահանջներին»:
Ես կարծում եմ, որ ընտանիքի՝ կին և տղամարդ ավանդական մոդելը անփոխարինելի է, և չի կարող այդ կարծրատիպը կոտրվել երբևէ: Ինչ վերաբերում է խտրական վերաբերմունքին և բռնությանը, ապա ևս մեկ անգամ ընդգծում եմ, որ դեմ եմ բռնության ցանկացած դրսևորմանը, հատկապես կանանց նկատմամբ և արձանագրում, որ ոչ ոք մեզ չի խանգարում մեր օրենսդրությունը էլ ավելի բարելավել և ապահովել պատժի աներկբա կիրառումը ցանկացած բռնարարքի դեմ՝ իսպառ վերացնելով անպատժելիության ցանկացած դրսևորում: Մեր ջանքերը պետք է այս ուղղությամբ գործադրենք…
Բարի ու խաղաղ հանգիստ բոլորիս: Հայաստանն այլ ճանապարհ չունի, քան ազգային պետություն դառնալը, ինչպես, օրինակ, Եվրամիության անդամ Ֆրանսիան է:
Հ. Գ. Եվրամիության անդամ 11 երկիր չի վավերացրել այս կոնվենցիան»:
