«Այնպես չէ, որ նրանք չգիտեին, որ Աբխազիան զավթվել է կամ Օսիան զավթվել է». Ալեն Սիմոնյանը Ռուսաստանին օկուպանտ է համարում
Ինչպես հայտնի է, օրեր առաջ վրաց-ռուսական հակամարտության նոր փուլը սկսվեց այն բանից հետո, երբ Ուղղափառության միջխորհրդարանական վեհաժողովը նախագահող ռուս պատգամավոր Սերգեյ Գավրիլովը վեհաժողովը նախագահելու համար փորձեց նստել Վրաստանի Խորհրդարանի նախագահի աթոռին։
Այս իրադարձությունների ժամանակ այնտեղ էր գտնվում նաև հայկական խորհրդարանականների պատվիրակությունը, որը խառնաշփոթի ժամանակ լքեց նիստերի դահլիճը։
ՀՀ պատվիրակության ղեկավար, Ազգային ժողովի փոխնախագահ Ալեն Սիմոնյանն Ազատություն TV-ի եթերում (տեսանյութում՝ 12-րդ րոպեից) խոսելով այդ իրադարձությունների պատճառների մասին՝ մասնավորապես նշել է, որ ինքը չի կարող կանխագուշակել, թե ինչ քայլեր կլինեն Ռուսաստանի կողմից, բայց կարող է միանշանակ ասել մի բան՝ առաջինը՝ այն, որ այդ ամենը, ինչ տեղի ունեցավ, միգուցե շատ հետաքրքիր և լավ կողմից կարելի է դիտարկել, բայց մի փոքր չի հասկանում այդ ամենի իմաստը, որովհետև արհեստականորեն այդ ամենը ստեղծվեց։
«Վրաստանը տարեկան մեկ միլիոնից ավելի տուրիստ է ընդունում, և ես ձեզ արդեն ասացի, որ այնտեղ բավականին շատ տուրիստներ կային նույնիսկ հիմա։ Կարող եմ ասել նաև, որ Վրաստանը միակողմանիորեն բացել է նաև Ռուսաստանի հետ վիզային ռեժիմը, այսինքն՝ վիզա չկա։ Նրանք իրենց տնտեսության մի մասը կառուցել են ռուսական տուրիզմի վրա, և ուղղակի Գավրիլովի գալով և այնտեղ նստեցնելով՝ մի թեմա հրահրվեց»,- ասաց ԱԺ փոխնախագահն ու հաջորդիվ հայտարարարեց՝ ուղղակիորեն ասելով, որ Ռուսաստանը զավթել է Աբխազիան ու Հարավային Օսիան:
«Այնպես չէ, որ նրանք չգիտեին, որ Աբխազիան զավթվել է իրենց ներկայությամբ, կամ Օսիան զավթվել է։ Արհեստականորեն քաղաքական օրակարգ ձևավորվեց, և ես չեմ կարծում, որ Վրաստանը սրանից շահեկան վիճակում դուրս կգա»,- Ազատություն TV-ի եթերում հայտարարեց Ազգային ժողովի փոխնախագահ Ալեն Սիմոնյանը՝ խոսելով ռուս-վրացական հակամարտության սրացման նոր փուլի մասին։
Նման տեսակի հայտարարությունները սկանդալային են ոչ միայն այն պատճառով, որ Ալեն Սիմոնյանը ՀՀ բարձրաստիճան պաշտոնյաներից մեկն է, այլ նաև այն պատճառով, որ Հայ-ռուսական միջխորհրդարանական հանձնաժողովի համանախագահը փաստացի Ռուսաստանին մեղադրում է Աբխազիան և Հարավային Օսիան զավթելու մեջ։
Անշուշտ, դժվար է երևակայել կամ պատկերացնել, թե ինչ արձագանք կլինի ռուսական կողմից այս արտահայտությունների վերաբերյալ։
Նշենք, որ առաջին անգամը չէ, որ ՀՀ ԱԺ փոխխոսնակ Ալեն Սիմոնյանը, չունենալով խորհրդարանական դիվանագիտության համապատասխան գիտելիքներ, փորձ, հմտություններ, նման հայտարարություններ է անում։
Ուշագրավ է, որ մասնավորապես շաբաթներ առաջ, հյուրընկալվելով «5-րդ ալիք» Հ/Ը-ում ու հարցազրույց տալով Ագնեսա Խամոյանին, արձագանքելով Արցախյան հակամարտության մասին իրեն ուղղված հարցին, այն միտքն էր արտաբերել, որ Արցախի վերաբերյալ պետք չէ իրեն հարցեր տալ, ինքը բարձրաստիճան պաշտոնյա է, կարող է ինչ-որ բան սխալ պատասխանել, ու սկանդալ լինի։
Փաստորեն, արտաքին աշխարհի սկանդալից Ալեն Սիմոնյանը չի վախենում։
