ՀՔԾ-ն ավարտել է Լևոն Երանոսյանի գործով նախաքննությունը
Պաշտոնեական լիազորություններն անցնելու մեջ մեղադրվող ՀՀ ոստիկանության ներքին զորքերի նախկին հրամանատար, գեներալ-լեյտենանտ Լևոն Երանոսյանի գործով նախաքննությունն ավարտվել է, գործն ուղարկվել է կողմերին՝ ծանոթանալու: «Արմենպրես»-ի հետ զրույցում այս մասին ասաց ՀՔԾ մամուլի խոսնակ Մարինա Օհանջանյանը:
«Առավել մանրամասն տեղեկատվություն կտրամադրենք առաջիկայում»,- ասաց Օհանջանյանը:
Ավելի վաղ, «Արմենպրես»-ի հետ զրույցում նրա պաշտպան Տիգրան Սաֆարյանը նշել էր, որ Հատուկ քննչական ծառայությունը մեղադրանք է առաջադրել Լևոն Երանոսյանին Քրեական օրենսգրքի 309 հոդվածների 1-ին և 2-րդ մասերով (Պաշտոնեական լիազորություններն անցնելը):
ՀՀ ոստիկանության ներքին զորքերի նախկին հրամանատար Լևոն Երանոսյանի նկատմամբ խափանման միջոց էր ընտրվել ստորագրությունը երկրից չհեռանալու մասին:
Լևոն Երանոսյանը Հատուկ քննչական ծառայություն էր հրավիրվել 2018 թվականի ապրիլի 16-ին և 22-ին, համապատասխանաբար, Բաղրամյան պողոտայում և Արցախի փողոցի սկզբնամասում տեղի ունեցած բախումների ընթացքում հատուկ միջոցներ կիրառելու գործով:
