«Ճարտարապետական հարցերը չպետք է որոշի մեկ մարդ՝ ամեն ինչ չպետք է կախված լինի մեկ մարդու ճաշակից». Ճարտարապետ

Օրերս քանդեցին Խորենացի 13 հասցեում գտնվող նախկին Լուսավորության նախարարության շենքի ճակատային հատվածը, ինչը մեծ աղմուկ բարձրացրեց հանրության շրջանում։ Ի պատասխան հասարակության բողոքների՝ Երևանի քաղաքապետարանն արձագանքել էր, որ շենքը մասնավորեցվել է, և սեփականատերը չի նախատեսել, որ պետք է պահպանի շենքի ճակատային հատվածը։

Ճարտարապետ Հրաչյա Պողոսյանն այսօր լրագրողների հետ զրույցում անդրադառնալով Խորենացի 13 հասցեում գտնվող շենքին և ընդհանրապես Հայաստանում առկա ճարտարապետական խնդիրներին՝ նշեց, որ դրանց մասին բազմիցս բարձրաձայնել են՝ շեշտելով, որ կառուցվածքը և մոտեցումը պետք է փոխվի։

«Արտասահմանյան փորձը ցույց է տալիս, որ շատ քաղաքներ, օրինակ՝ Փարիզը, Նյու Յորքը, գլխավոր ճարտարապետ չունեն, նման հաստիք ընդհանրապես գոյություն չունի։ Այսինքն՝ պետք է աշխատել այնպես անել, որ քաղաքին վերաբերող կարևորագույն խնդիրները կախված չլինեն մեկ մարդու կամքից կամ ճաշակից, դժվար իրավիճակի մեջ է հայտնվում նաև այդ մարդը, քանի որ մեկ մարդուն միշտ էլ հնարավոր է համոզել, «կոտրել», շատ վատ բաներ չեմ ասում, որովհետև այժմ դա բացառվում է, հատկապես՝ Արթուր Մեսչյանի պարագայում»,- ասաց ճարտարապետը։

Նրա խոսքով՝ Լուսավորության նախարարության նախկին շենքն արժեք էր և չէր կարելի քանդել։ Ավելին՝ որևէ մեկի մտքով չի անցնում, հատկապես՝ հեղափոխությունից հետո, որ հանրային՝ Ճարտարապետների պալատի և հանրության կարծիք ստեղծի։

«Հանրությունն այս տեսակ բաների մասին տեղեկանում է այն ժամանակ, երբ էքսկավատորը սկսում է աշխատել, իսկ ճարտարապետներն ընդհանրապես այդ գործի հետ կապ չունեն։ Այս շենքի քանդման գործընթացը տեսել եմ սոցիալական ցանցում, շատ եմ վրդովվել, Ճարտարապետների պալատն այս հարցում մի կողմի վրա է, և որևէ մեկը նրա կարծիքը չի հարցնում։ Քանդվող շենքը շատ լավ արտացոլում էր իր կառուցման այն ժամանակաշրջանը»,- շեշտեց Հրաչյա Պողոսյանը։

Նրա դիտարկմամբ՝ խախտվում են բոլոր կարգերը, ճիշտ այնպես, ինչպես «Երիտասարդական պալատի» ժամանակ, այսինքն՝ սկզբում քանդում են, հետո միայն մտածում, թե փոխարենն ինչ պետք է կառուցեն։

«Սկզբում պետք է նախագիծը լինի, թե ինչ են կառուցելու քանդելուց հետո, նախագիծը պետք է համաձայնեցվի, այնուհետև թույլատրվի կառույցը քանդել։ Այս շենքի դեպքում նման նախագիծ ասպարեզում չկա, մենք չգիտենք, թե տվյալ ճարտարապետն ո՞վ է, ի՞նչ է ուզում անել։ Ճարտարապետների պալատում մենք ունենք որակավորման հանձնաժողով, բոլոր նախագծողները և նախագծերը գալիս են մեր հանձնաժողով և ստանում համաձայնություն, այդ ճարտարապետը մեզ մոտ չի եկել։ Այստեղ ես մեկ վտանգավոր բան եմ տեսնում, որ այդ նախագիծն իր մեջ ներառում է նաև նախկին «Սևան» հյուրանոցի տարածքը, այսինքն՝ հյուրանոցի փոխարեն կառուցվում է այս շենքը՝ քանդելով նաև հետևի տարածքը»,- ընդգծեց ճարտարապետը։

Նա նկատեց, որ «Սևան» հյուրանոցի կառուցումը Երևանի կարևորագույն խնդիրներից է. այն ժամանակին գնել է լոնդոնաբնակ Վաչե Մանուկյանը, մեկ պայմանով՝ որ տվյալ շենքը քանդվի։

Հրաչյա Պողոսյանն առաջարկում է, որ նախագիծն անհապաղ քննարկվի։

Զվարթ Խաչատրյան