Պակիստանը լարվածության թուլացում է արձանագրել Նյու Դելիի և Իսլամաբադի հարաբերություններում
Պակիստանի արտաքին գործերի նախարար Շահ Մեհմուդ Քուրեշին հայտարարել է, որ լարվածության թուլացման միտում է նկատում Հնդկաստանի եւ Պակիստանի հարաբերություններում: Այդ կարծիքը ԱԳ նախարարության ղեկավարը մարտի 6-ին հայտնել է լրագրողներին։
«Հնդկաստանի եւ Պակիստանի հարաբերություններում լարվածությունը, ըստ երեւույթին, նվազում է,-հայտարարել է արտաքին քաղաքական գերատեսչության ղեկավարը:-Դա դրական իրադարձություն է»: «Պակիստանն էլ ավելի է ակտիվացրել իր դիվանագիտական ջանքերը: Այդ կապակցությամբ մենք որոշել ենք Պակիստանի դեսպանին վերադարձնել Նյու Դելի»,-ասել է նախարարը:
Քուրեշին նաեւ նշել է, որ երկու պետությունների միջեւ լարվածության թուլացման հարցում կարեւոր դեր է խաղացել մյուս երկրների օգնությունը: «Չինաստանի, Ռուսաստանի, Թուրքիայի, Արաբական Միացյալ Էմիրությունների եւ Հորդանանի արտաքին գործերի նախարարները զգալի դեր խաղացին լարվածության նվազեցման համար»,-նշել է նա՝ ընդսմին առանձին շնորհակալություն հայտնելով նաեւ ԱՄՆ-ի պետքարտուղար Մայքլ Փոմպեոյին, հաղորդել է ՏԱՍՍ-ը:
