Ճապոնիան չի փոխել իր դիրքորոշումը Ռուսաստանի հետ հաշտության պայմանագիր կնքելու հարցում
Ճապոնիայի կառավարությունը չի փոխել իր դիրքորոշումը Ռուսաստանի հետ հաշտության պայմանագիր կնքելու և տարածքային հարցը լուծելու նկատմամբ: «Արմենպրես»-ի փոխանցմամբ՝ այս մասին հայտարարել է Ճապոնիայի նախարարների կաբինետի գլխավոր քարտուղար Մինորու Կիհարան։
«Տարածքային խնդիրը լուծելու, հաշտության պայմանագիր կնքելու ուղղությամբ քաղաքական ուղեգծում փոփոխություններ չկան. կշարունակենք աշխատել նույն ուղղությամբ», – նրա խոսքը մեջբերել է NHK հեռուստաալիքը։
Միևնույն ժամանակ նա հերքել է այն հայտարարությունները, թե Տոկիոն է պատասխանատվություն կրում Ճապոնիայի և Ռուսաստանի միջև հարաբերությունների վատթարացման համար՝ նման զարգացման պատճառ նշելով ՌԴ-ի և Ուկրաինայի միջև հակամարտությունը։
Սեպտեմբերի 1-ին Բիշքեկում մամուլի ասուլիսի ժամանակ ՌԴ նախագահ Վլադիմիր Պուտինը ռուս-ճապոնական հարաբերությունների վատթարացման համար պատասխանատու էր համարել Տոկիոյին և ափսոսանք ու տարակուսանք հայտնել Ճապոնիայի դիրքորոշման կապակցությամբ։
Ճապոնիան հավակնում է չորս հարավային Կուրիլյան կղզիներին՝ Իտուրուպին, Կունաշիրին, Շիկոտանին և Հաբոմայիին՝ հղում անելով 1855 թվականի Առևտրի և սահմանների մասին տրակտատին։ Մոսկվայի դիրքորոշումն այն է, որ Հարավային Կուրիլները ԽՍՀՄ-ի կազմ են մտել Երկրորդ համաշխարհային պատերազմի արդյունքներով, և դրանց նկատմամբ Ռուսաստանի ինքնիշխանությունը, որն ունի միջազգային իրավական ձևակերպում, կասկածի ենթակա չէ։
