Մարդկանց ապօրինի տեղափոխմամբ զբաղվող մաքսանենգները միգրանտներին Անգլիայից տեղափոխում են Իսպանիա
Մարդկանց ապօրինի տեղափոխմամբ զբաղվող մաքսանենգները սկսել են միգրանտներին Մեծ Բրիտանիայից տեղափոխել Իսպանիա, որտեղ գործում է օտարերկրացիների օրինականացման ծրագիր։ Այդ մասին հայտնում է The Telegraph թերթը։
Թերթի տվյալներով՝ մաքսանենգները միգրանտներին բեռնատարներով ապօրինի տեղափոխում են Լա Մանշի նեղուցով դեպի Ֆրանսիա, այնուհետև հասցնում Իսպանիա։ Այս երթուղու արժեքը հասնում է 1 հազար ֆունտ ստեռլինգի, իսկ հավելավճարի դիմաց հնարավոր է օգտվել նաև տաքսու ծառայությունից մինչև Իսպանիայի սահման։
The Telegraph-ի փոխանցմամբ՝ այս ուղղության աճող պահանջարկը պայմանավորված է միգրացիոն օրենսդրության բարեփոխմամբ, որը Իսպանիայի իշխանությունները հաստատել են 2026 թվականի ապրիլին։ Այն հնարավորություն է տալիս հարյուր հազարավոր անօրինական միգրանտների օրինականացնել իրենց գտնվելը երկրում։
Հիշեցնենք, հուլիսի 30-ին հազարավոր աֆրիկացի միգրանտներ ճեղքել են սահմանային ցանկապատը՝ Մարոկկոյից Իսպանիայի Սեուտա քաղաք մուտք գործելու համար։ Ըստ ներկայացված տեղեկության՝ Սեուտա է մուտք գործել շուրջ 60 հազար մարդ, իսկ քաղաք հասնելու փորձերի ընթացքում զոհվածների թիվն աճել է մինչև 90։ Զանգվածային ներհոսքից հետո մարդկանց մի մասը սկսել է թաքնվել խողովակներում և թունելներում՝ Մարոկկո վերադարձից խուսափելու համար, իսկ մյուսները շարունակել են մնալ քաղաքի փողոցներում՝ առանց հստակ նպատակի։
