ԱՄՆ-ն չի պատրաստվում ռազմական միջամտությամբ փոխել Իրանի իշխանությունը․ Վենս
ԱՄՆ-ն չի պատրաստվում ամերիկյան զինվորականներ ուղարկել Իրան՝ իսլամական հանրապետությունում իշխանափոխություն իրականացնելու նպատակով ցամաքային գործողություն անցկացնելու համար։ Այս մասին հայտարարել է ԱՄՆ փոխնախագահ Ջեյ Դի Վենսը։
«Եթե Իրանի ժողովուրդը ցանկանա ապստամբել և փոխել իր կառավարությունը՝ դա նրանց գործն է, սակայն մենք չենք պատրաստվում այնտեղ ուղարկել 150 հազար ցամաքային զինվորականների»,- ասել է նա ամերիկացի կատակերգու և հաղորդավար Ջո Ռոգանի փոդքաստում։
Վենսի խոսքով՝ ամերիկյան զորքեր ուղարկելու առաջարկը փաստացի նշանակում է, որ ԱՄՆ զինված ուժերը պետք է «Իրանի ժողովրդի փոխարեն կատարեն այդ աշխատանքը»։
«Մենք այլևս դրանով չենք զբաղվում»,- հավելել է ԱՄՆ փոխնախագահը։
Վենսը նշել է, որ այս պահին ԱՄՆ-ի նպատակն է ապահովել նավթի և գազի անխոչընդոտ փոխադրումը, ինչպես նաև «զսպել Իրանին միջուկային զենքի ծրագիր ունենալուց՝ կիրառելով դիվանագիտական և ռազմական միջոցներ»։
