Սանկտ Պետերբուրգում ձերբակալել են «Հյուսիս-Արևմուտքի մահմեդականների համայնք» կազմակերպության ղեկավարին
Սանկտ Պետերբուրգում ձերբակալել են «Հյուսիս-Արևմուտքի մահմեդականների համայնք» կենտրոնացված կրոնական կազմակերպության նախագահ Մոհամմեդ Խեննիին։ Դրա մասին հայտնել են «Ъ Северо-Запад»-ի աղբյուրները։
Գործի մանրամասները չեն բացահայտվում։
«Ъ Северо-Запад»-ի աղբյուրը պնդում է, որ ձերբակալությունը կապված է մի քանի տարածաշրջաններում Մահմեդականների հոգևոր վարչության (ՄՀՎ) ներկայացուցիչների կալանավորումների հետ։ Ապրիլի 21-ին Մոսկվայի Տագանսկի դատարանը 15-օրյա վարչական կալանք է սահմանել Կարելիայի իմամ և նախկին մուֆթի Վիսամ Ալի Բարդվիլի նկատմամբ՝ «Շերեմետևո» օդանավակայանում իրավապահներին փաստաթղթերը ցույց տալուց հրաժարվելու համար։ Բացի դրանից, Մորդովիայում ձերբակալել են տեղի Մահմեդականների հոգևոր վարչության ղեկավար Ռաիլ-հազրաթ Ասաինովին։
Մոհամմեդ Խեննին 2017-2020 թվականներին եղել է «Հյուսիս-Արևմուտքի մահմեդականների համայնքի» իմամը։ Դրանից հետո նա դարձել է կազմակերպության նախագահը։ Մինչ համայնքում աշխատելը Խեննին գլխավորել է Սանկտ Պետերբուրգի «Իսլամական կազմակերպությունների միությունը» և «Իսլամական մշակութային կենտրոնը»։
2007 թվականին Մոհամմեդ Խեննիի դեմ գործ էր հարուցվել միջէթնիկական թշնամանք հրահրելու հոդվածով։ Ավելի ուշ նրա կարգավիճակը կասկածյալից փոխվել էր վկայի։ Ռուսաստանի մուֆթիների խորհրդի ներկայացուցիչները Խեննիի քրեական հետապնդումն անվանել էին սխալմունք, գրում է «Коммерсантъ»։
