Հունգարիայի վարչապետը պահանջում է երկրի նախագահի հրաժարականը. նախագահը հրաժարվում է կատարել այդ պահանջը
Հունգարիայի նախագահ Թամաշ Սուլյոկը որոշում է կայացրել չենթարկվել նորընտիր վարչապետ Պետեր Մադյարի՝ պաշտոնից հրաժարական տալու կոչին։ Իր որոշման մասին նա խոսել է Index.hu-ին տված հարցազրույցում։
«Ներկայում չկա որևէ իրավական կամ սահմանադրական հիմնավորում, որը կարող է արդարացնել իմ հրաժարականը», – ասել է Սուլյոկը։
Մադյարի TISZA կուսակցությունը ապրիլին խորհրդարանական ընտրություններում ջախջախիչ հաղթանակ տարավ նախկին առաջնորդ Վիկտոր Օրբանի Fidesz կուսակցության նկատմամբ՝ վերջ դնելով նրա 16-ամյա կառավարմանը և խոստանալով լուծել օրենքի գերակայության հարցերը և կատարել այլ բարեփոխումներ։
Ընտրություններն անվանելով «ռեժիմի փոփոխության քվեարկություն»՝ Մադյարը ճնշում է գործադրում Fidesz կուսակցության աջակցությունն ունեցող Սուլյոկի և այլ պաշտոնյաների վրա՝ հորդորելով մինչև մայիսի վերջ հրաժարական տալ։
«Ես հավատարիմ եմ մնում իմ երդմանը, և քանի դեռ իմ պաշտոնի իրականացումը անհնար չէ, ես մտադիր եմ կատարել ստանձնած մանդատը»,- նշել է Հունգարիայի նախագահը։
Հունգարիայում նախագահի դերը հիմնականում արարողակարգային է, թեպետ երկրի նախագահը խնդիր նկատելու դեպքում կարող է օրենքները վերանայման նպատակով հետ ուղարկել խորհրդարան կամ Սահմանադրական դատարան, ինչը հնարավոր է խոչընդոտի Մադյարի բարեփոխումների գործընթացին։
Մադյարը պահանջում է Սուլյոկի և Օրբանի օրոք նշանակված այլ «խամաճիկների» հրաժարականը։
Index.hu-ի հետ հարցազրույցում Սուլյոկը նշել է, որ նախագահը պետք է խորհրդանշի ազգի միասնությունը՝ հայտարարելով, որ ընտրությունները ոչ թե ռեժիմի էին, այլ կառավարության փոփոխություն էին։
Մադյարը հայտարարել է, որ եթե Սուլյոկը հրաժարական չտա, նա կօգտագործի իր կուսակցության մեծ մանդատը սահմանադրությունը և այլ օրենսդրական ակտերը փոփոխելու և իրեն պաշտոնից հեռացնելու համար։
Սուլյոկի հարցազրույցին ի պատասխան՝ Մադյարը մայիսի 18-ին «Ֆեյսբուք»-ի իր էջում գրել է, որ Հունգարիային անհրաժեշտ է նախագահ, որը հավատարիմ չէ որևէ քաղաքական ճամբարի, և կրկնել է, որ նախագահը «ձախողված համակարգի խամաճիկ» է։
«Դու պետք է հեռանաս։ Եվ դու կհեռանաս», – գրել է նա։
