Պենտագոնի ղեկավարությունն իր կենտրոնակայանում փակել է լրագրողների աշխատանքային գոտին

ԱՄՆ պաշտպանության նախարարությունը կարգադրել է հավատարմագրված լրագրողներին լքել գերատեսչության կենտրոնական գրասենյակում գտնվող իրենց աշխատանքային վայրերը։ Այս որոշումը կայացվել է այն բանից հետո, երբ դատարանը Պենտագոնի գործողությունները ճանաչել է որպես ԶԼՄ-ների աշխատակիցների իրավունքների խախտում։ Այս մասին ասված է պաշտպանության նախարարի հանրային կապերի գծով օգնական Շոն Պարնելի՝ մարտի 23-ին հրապարակված հայտարարության մեջ։

Ըստ Պարնելի՝ Պենտագոնը համաձայն չէ Կոլումբիայի օկրուգային դատարանի որոշման հետ, սակայն կատարում է այն։ Դատարանը բավարարել էր The New York Times (NYT) պարբերականի հայցը՝ նախարարությանը պարտավորեցնելով վերականգնել թերթի յոթ թղթակիցների անցագրերը և չեղարկել հավատարմագրման սահմանափակումները, որոնք մտցվել էին անցյալ տարվա հոկտեմբերին։

Այս ամենի հետ կապված՝ Պենտագոնը հրահանգել է անհապաղ փակել գերատեսչության շտաբ-բնակարանում երկար ժամանակ գործող լրագրողների աշխատանքային գոտին։ «Նոր աշխատանքային տարածքը կստեղծվի առանձին շենքում՝ Պենտագոնի [կենտրոնական մասնաշենքից] դուրս, բայց դրա տարածքում։ Այն հասանելի կլինի պատրաստ լինելուն պես»,- հայտարարել է Պարնելը։

Բացի այդ, ռազմական գերատեսչության ղեկավարությունը սահմանափակել է Պենտագոնում լրագրողների մուտքը (առանց ուղեկցության)։ Պարնելը չի հստակեցրել, թե հատկապես երբ պատրաստ կլինի ԶԼՄ-ների աշխատակիցների համար նախատեսված նոր աշխատանքային գոտին և որտեղ են նրանք տեղակայվելու մինչ այդ։

2025 թվականի հոկտեմբերի 16-ին Associated Press գործակալությունը հայտնել էր, որ մի քանի տասնյակ լրագրողներ որոշել են հանձնել իրենց անցագրերը՝ որպես բողոքի նշան գերատեսչության ղեկավար Փիթ Հեգսեթի կողմից մտցված սահմանափակումների դեմ։ The New York Times-ը Հեգսեթի գործողությունները որակել է որպես «աննախադեպ թշնամական»՝ պնդելով, որ նրա ղեկավարությամբ Պենտագոնն առաջատար լրատվամիջոցներին զրկել է աշխատանքային տարածքներից՝ դրանք տրամադրելով պահպանողական պարբերականներին։ Բացի այդ, սահմանափակվել է գերատեսչության միջանցքներով թղթակիցների ազատ տեղաշարժը և ներդրվել են խիստ կանոններ, որոնք կարող են հանգեցնել մամուլի քարտերի չեղարկման։ Դեկտեմբերին NYT-ն դատի էր տվել Պենտագոնին՝ հայտարարելով, որ ռազմական թեմաների լուսաբանման սահմանափակումները խախտում են լրագրողների սահմանադրական իրավունքները։