Իրաքում շիա աշխարհազորայինների մի քանի հրամանատարներ են սպանվել․ Al Hadath
Իրաքի արևմուտքում գտնվող Անբար նահանգում «Ալ-Հաշդ աշ-Շաաբի» շիական ժողովրդական աշխարհազորի դիրքերին հասցված օդային հարվածի հետևանքով հրամանատարական կազմի մի քանի ներկայացուցիչներ են սպանվել։ Այս մասին հայտնում է Al Hadath հեռուստաալիքը։
Իրաքի անվտանգության ծառայության աղբյուրների փոխանցմամբ՝ ավիահարվածը հասցվել է Անբարի Էլ-Հաբբանիա քաղաքի մոտ գտնվող աշխարհազորի շտաբին։ Նշվում է, որ ռմբակոծության հետևանքով «զոհվել են «Ալ-Հաշդ աշ-Շաաբիի» մի քանի հրամանատարներ»։
«Ալ-Հաշդ աշ-Շաաբի» ջոկատները ձևավորվել են Իրաքում «Իսլամական պետություն» (ԻՊ) ահաբեկչական խմբավորման գրոհայինների դեմ պայքարի տարիներին և զգալի դեր են խաղացել ԻՊ-ի դեմ տարած հաղթանակում։ Շիական աշխարհազորը պաշտոնապես ընդգրկված է Իրաքի բանակի կազմում, սակայն ԱՄՆ-ն «Ալ-Հաշդ աշ-Շաաբին» դիտարկում է որպես իրանամետ կառույց, որը, Վաշինգտոնի համոզմամբ, աջակցություն և ֆինանսավորում է ստանում Թեհրանի իշխանություններից։
