Մեծ Բրիտանիայի դեսպանը կանչվել է Վրաստանի ԱԳՆ
Մեծ Բրիտանիայի դեսպան Գարեթ Ուորդը փետրվարի 26-ին ժամանել է Վրաստանի արտաքին գործերի նախարարություն, որտեղ մոտ մեկ ժամ մնալուց հետո հեռացել է՝ առանց որևէ մեկնաբանություն տալու լրատվամիջոցներին։ Այս մասին հայտնում է Վրաստանի Առաջին ալիքը։
Նախօրեին Վրաստանի արտգործնախարար Մակա Բոճորիշվիլին հայտնել էր, որ Բրիտանիայի դեսպանը կանչվել է ԱԳՆ վրացական «Իմեդի» և «POSTV» հեռուստաընկերությունների դեմ սահմանված պատժամիջոցների հետ կապված։ Նախարարը նշել էր, որ վրացական կողմը կպահանջի բացատրություն, թե ինչ հիմքով է կայացվել այդ պատժամիջոցները կիրառելու որոշումը։
«Բացի այն, որ մենք խոսում ենք խոսքի ազատության և խոսքի ազատության չափանիշների մասին, պատժամիջոցների հարցում անհրաժեշտ են շատ ամուր իրավական հիմքեր», – ասել էր Մակա Բոճորիշվիլին։
Փետրվարի 24-ին Մեծ Բրիտանիան պատժամիջոցներ կիրառեց «Իմեդի»-ի և «POSTV»-ի դեմ։ Մեծ Բրիտանիայի կառավարության տվյալներով՝ պատժամիջոցները կիրառվել են որպես «ռուսական ապատեղեկատվության տարածման մեջ ներգրավված կազմակերպությունների» դեմ։ Պատժամիջոցները ներառում են ակտիվների սառեցում, ակտիվների կառավարման հետ կապված ֆինանսական ծառայություններ մատուցելու արգելք և տնօրենների որակազրկում։ Պատժամիջոցների փաստաթղթում նշվում է, որ «Իմեդին» և POSTV-ն «դիտավորյալ տարածում են մոլորեցնող տեղեկատվություն Ռուսաստանի կողմից Ուկրաինա լայնածավալ ներխուժման մասին իրենց լսարանին, որը հիմնականում Վրաստանում է»։
