Լեհաստանի վարչապետ Տուսկը ժամանել է Կիև
Լեհաստանի վարչապետ Դոնալդ Տուսկը ժամանել է Կիև։ Այս մասին հայտնել է Լեհաստանի վարչապետի գրասենյակը X միկրոբլոգում արված գրառման մեջ։
Փետրվարի 3-ին կառավարության նիստից առաջ Տուսկը հայտարարել էր, որ Ուկրաինայի նախագահ Վոլոդիմիր Զելենսկու հրավերով կայցելի Կիև։
«Պատահական չէ, որ այս այցի ժամանակ ինձ կուղեկցի ֆինանսների և էկոնոմիկայի նախարար Անջեյ Դոմանսկին, ով իր թիմի հետ միասին նախապատրաստում է Ուկրաինայի վերակառուցման վերաբերյալ գլոբալ համաժողովը»,- հայտարարել է Տուսկը։
Նա հավելել է, որ համաժողովը տեղի կունենա հունիսին՝ Գդանսկում։
«Մենք հույս ունենք, որ պատերազմի արագ ավարտից կամ առնվազն հրադադարից հետո կկարողանանք սկսել Ուկրաինայի վերակառուցման մեծ ծրագիրը։ Եվ սա նաև նշանակում է խոշոր ներդրումներ, խոշոր ռեսուրսներ և խոշոր ձեռնարկումներ»,- ընդգծել էր Լեհաստանի վարչապետը։
