Եգիպտոսից Գազա է վերադարձել պաղեստինցիների առաջին խումբը
Պաղեստինցիների առաջին խումբը Ռաֆահի անցակետով Եգիպտոսից վերադարձել է Գազայի հատված։ Այս մասին հայտնում է Safa գործակալությունը։
12 պաղեստինցիների տեղափոխող ավտոբուսը ժամանել է Գազայի հարավային հատվածում Խան Յունիսի Նասեր բժշկական համալիր՝ բժշկական զննում անցնելու նպատակով։
Տեղեկություններ են հաղորդվում նաև այն մասին, որ բժշկական օգնության կարիք ունեցող պաղեստինցիների խումբը 2025 թվականի փետրվարից ի վեր առաջին անգամ հատել է Գազայի հատվածի և Եգիպտոսի միջև սահմանը և մուտք գործել Եգիպտոսի Հյուսիսային Սինայ նահանգի հիվանդանոցներ։
Նախնական գնահատականներով՝ ավելի քան 20 000 պաղեստինցի բուժման կարիք ունի արտասահմանում։
Եգիպտոսի սահմանին գտնվող Ռաֆահի անցակետը, որը Գազայի հատվածի հիմնական ելքն է արտաքին աշխարհ, փետրվարի 2-ին բացվել է հետիոտների համար։ Իսրայելական լրատվամիջոցները հայտնել են, որ բացումը փորձնական է։ Նշվել է, որ անցակետով անցումը սահմանափակ կլինի. օրական 150 մարդ կարող է լքել Գազան, 50-ը կարող են վերադառնալ։ Նաև ընդգծվել է, որ Եգիպտոսից Ռաֆահի անցակետով մարդասիրական օգնության մուտք դեպի Գազայի հատված չի թույլատրվի։
