Թրամփը հրամանագիր է ստորագրել է տիեզերքի յուրացման գործում առաջատարության հասնելու վերաբերյալ
ԱՄՆ նախագահ Դոնալդ Թրամփը ստորագրել է հրամանագիր, որն ուղղված է NASA Artemis տիեզերական ծրագրի շրջանակներում տիեզերագնացներին Լուսին վերադարձնելուն՝ նպատակ ունենալով ստեղծել մշտական ներկայություն Լուսնի վրա: Համապատասխան փաստաթուղթը հրապարակել է Սպիտակ տունը։
Նշվում է, որ Թրամփի վարչակազմն իր քաղաքականությունը կկենտրոնացնի տիեզերքի յուրացման ոլորտում համաշխարհային առաջատարության հասնելու և տիեզերքում ամերիկյան ներկայությունն ընդլայնելու վրա՝ ամերիկացիներին Artemis ծրագրի շրջանակներում Լուսին վերադարձնելով մինչև 2028 թվականը, ինչպես նաև պատրաստվելով դեպի Մարս ուղևորության։
Փաստաթուղթը նաև նախատեսում է «մինչև 2030 թվականը ստեղծել մշտական լուսնային ֆորպոստի նախնական տարրեր»։
Հրամանագիրը հաստատում է NASA-ի ծրագրերը տիեզերքում միջուկային էներգետիկայի զարգացման նպատակով՝ «Լուսնի վրա և ուղեծրում տեղակայելով միջուկային ռեակտորներ, ներառյալ ռեակտոր՝ Լուսնի մակերևույթի վրա՝ մեկնարկի պատրաստ մինչև 2030 թվականը»։
Ի թիվս այլ բաների, հրամանագիրն ուղղված է մինչև 2028 թվականը հաջորդ սերնդի հակահրթիռային պաշտպանության տեխնոլոգիաների մշակմանը՝ Թրամփի «Ոսկե գմբեթ» նախագծի շրջանակներում, և կոչ է անում զարգացնել կարողությունները ցածր մերձերկրյա ուղեծրից և շուրջլուսնային տարածությունից ԱՄՆ-ի համար սպառնալիքները հայտնաբերելու և դրանց հետևելու համար։
Հրամանագրի համաձայն՝ ԱՄՆ-ն մտադիր է մինչև 2028 թվականը ամերիկյան տիեզերական շուկաներ ներգրավել առնվազն 50 մլրդ դոլարի լրացուցիչ ներդրումներ։
