Զելենսկին հայտարարել է, որ չի պլանավորում մեկնել Մոսկվա
Ուկրաինայի նախագահ Վլադիմիր Զելենսկին հայտարարել է, որ չի պլանավորում մեկնել Մոսկվա՝ Ռուսաստանի առաջնորդ Վլադիմիր Պուտինի հետ հանդիպելու համար։
Նա այս մասին ասել է Փարիզում «կամավորների կոալիցիայի» հանդիպումից հետո տեղի ունեցած մամուլի ասուլիսում։
«Եթե ուզում եք, որ հանդիպումը չկայանա, հրավիրեք ինձ Մոսկվա։ Սակայն Ռուսաստանը սկսել է խոսել հանդիպման մասին՝ դա արդեն լավ է», – ասել է Զելենսկին։
Ավելի վաղ Պուտինը հայտարարել էր, որ երբեք չի բացառել Զելենսկիի հետ հանդիպման հնարավորությունը, բայց կասկածում է դրա իրագործելիության վրա։ Ռուսաստանի նախագահի խոսքով՝ ԱՄՆ նախագահ Դոնալդ Թրամփը խնդրել է անցկացնել նման հանդիպում, ինչին Պուտինը պատասխանել է. «Այո, հնարավոր է։ Ի վերջո, եթե Զելենսկին պատրաստ է, թող գա Մոսկվա, նման հանդիպումը կկայանա»։
Թրամփը նախկինում հայտարարել էր, որ Պուտինը և Զելենսկին ներկայումս պատրաստ չեն խաղաղության։
