Լևոն Մնացականյանը Բաքվի դատարանում հայտարարել է, որ մասնակցել է ղարաբաղյան առաջին պատերազմի մարտերին
Բաքվում շարունակվում է Արցախի ռազմաքաղաքական ղեկավարության դեմ շինծու մեղադրանքներով դատական գործընթացը։
Այսօր՝ սեպտեմբերի 1-ին դատավարության ժամանակ հրապարակվել է Արցախի պաշտպանության բանակի նախկին հրամանատար Լևոն Մնացականյանի ցուցմունքը։
Ինչպես հաղորդում են ադրբեջանական լրատվամիջոցնրը, Մնացականյանը իր ցուցմունքում նշել է, որ իր ծառայությունը Արցախում սկսել է 1992 թվականի սեպտեմբերին՝ որպես գումարտակի հրամանատարի տեղակալ։ Ըստ ցուցմունքի՝ Մնացականյանն ասել է, որ նշանակվել է տարբեր պաշտոններում, իսկ 2007 թվականի մայիսից մինչև 2012 թվականի նոյեմբերը եղել է Արցախի պաշտպանության բանակի շտաբի պետ, այնուհետև՝ 2012 թ. նոյեմբերից մինչև 2015 թ. հունիսը՝ ՀՀ զինված ուժերի գլխավոր շտաբի պետի տեղակալ։ Թոշակի անցնելուց հետո նա ոչ մի տեղ չի աշխատել։
1992 թվականի սեպտեմբերից որպես սպա զինվորական ծառայություն սկսելու պահից ի վեր Մնացականյանը մասնակցել է առաջին ղարաբաղյան պատերազմի մարտերին՝ Քարվաճառի, Ֆիզուլիի, Աղդերեի, Աղդամի և Ջեբրաիլի շրջանների ուղղությամբ՝ նշվել է նրա ցուցմունքի մեջ։
