Փոփոխություն՝ Վրաստանում IT ոլորտում աշխատող օտարերկրացիների բնակության իրավունքի օրենքում

Վրաստանում փոփոխություններ են կատարվել օտարերկրացիների համար բնակության թույլտվություն ստանալու կանոններում: Ըստ փոփոխությունների՝ տեխնոլոգիաների ոլորտում աշխատող օտարերկրացիները կկարողանան ստանալ բնակության իրավունք, եթե իրենց գործունեությունից ստացված տարեկան եկամուտը կազմում է ոչ պակաս, քան 25 հազար ԱՄՆ դոլարի համարժեքը: Դրա համար նրանք պետք է ներկայացնեն համապատասխան վկայական, ըստ aliq.ge-ի՝ փոխանցել է BPN լրատվամիջոցը:

Նախկինում «Վրաստանում բնակության թույլտվության տրամադրման քննարկման և որոշումների կայացման կանոնների հաստատման մասին» կանոնակարգում նման կետ չկար:
Նոր որոշման համաձայն՝ տեղեկատվական տեխնոլոգիաների (IT) ոլորտում աշխատող անձը ժամանակավոր բնակության թույլտվություն ստանալու համար պետք է ներկայացնի հետևյալ փաստաթղթերը.

Դիմում, որտեղ, այլ տվյալների հետ մեկտեղ, պետք է նշված լինի աշխատանքային ներգաղթյալի գրանցման ժամանակ ներքին տեղահանված անձանց համար Վրաստանի աշխատանքի, առողջապահության և սոցիալական պաշտպանության նախարարության հատուկ էլեկտրոնային համակարգում գրանցվող եզակի կոդը,
օտարերկրացու ճանապարհորդական փաստաթղթի պատճենը,
Վրաստանում օրինական բնակությունը հաստատող փաստաթղթի պատճենը,
Տեղեկատվական տեխնոլոգիաների ոլորտում ընդհանուր առմամբ առնվազն 2 տարվա աշխատանքային փորձը հաստատող փաստաթուղթ,
Տեղեկանք, որը հաստատում է, որ վերջին 1 տարվա ընթացքում տեղեկատվական տեխնոլոգիաների ոլորտում աշխատանքային կամ տնտեսական գործունեության արդյունքում ստացված վարձատրության չափը տարեկան պակաս չէ 25 հազար ԱՄՆ դոլարի համարժեքից լարիով։ Ներկայացված փաստաթղթերը պետք է հաստատեն վարձատրության ստացումը վերջին 1 տարվա ընթացքում առնվազն երկու անգամ, առնվազն 30-օրյա ընդմիջումներով,
Գունավոր լուսանկար, չափսը՝ 3/4, էլեկտրոնային տարբերակով,
Ծառայության վճարումը հաստատող անդորրագիր և այլն։

Փաստաթղթում նշված է նաև, որ տեղեկատվական տեխնոլոգիաների ոլորտում աշխատող է համարվում.

Աշխատանքի միջազգային կազմակերպության մասնագիտությունների միջազգային ստանդարտ դասակարգման (ISCO-08) 25-րդ կոդով և նույն կոդի համապատասխան ենթակոդերով ընդգրկված ցանկացած գործունեությամբ զբաղվող օտարերկրացին,
Վրաստանում գրանցված որպես ձեռնարկատեր՝ փոքր բիզնեսի կարգավիճակով և «Տնտեսական գործունեության տեսակների Վրաստանի ազգային դասակարգչի» 58.21, 58.29, 62.01, 62.02, 62.03, 62.09, 63.1 և 63.12 կոդերով նախատեսված ցանկացած գործունեություն իրականացնող օտարերկրացին։

Որոշման համաձայն՝ Վրաստանում ժամանակավոր բնակության թույլտվությունները տրվում են 6 ամսից մինչև 3 տարի ժամկետով։ Փաստաթղթում նշված է նաև, որ ժամանակավոր բնակության թույլտվության վավերականության ժամկետը կարող է երկարաձգվել 3-3 տարով, ոչ ավելի, քան 12 տարով։
Որոշման մեջ նաև նշված է, որ տեղեկատվական տեխնոլոգիաների ոլորտում աշխատող անձի ժամանակավոր բնակության թույլտվության վավերականության ժամկետը դադարեցվում է, եթե նույնիսկ այդ թույլտվությունը կրող անձը փաստացի չի գտնվում Վրաստանի տարածքում 183 օր կամ ավելի քան 183 օր՝ ցանկացած անընդմեջ ժամանակահատվածում, 12 օրացուցային ամիսների ընթացքում։