Հայտնի են օգոստոսին աշխարհում ամենաթանկացած և ամենաէժան ապրանքները

Վերլուծելով ICE Futures-ի, CME Group-ի և Շանհայի մետաղների բորսայի տվյալները՝ «ՌԻԱ Նովոստի»-ն պարզել է, որ օգոստոսին աշխարհում ամենաշատը թանկացել են «Ռոբուստա» և «Արաբիկա» սուրճի տեսակները, իսկ ամենաշատը էժանացել են փայտանյութն ու պղինձը։

Այսպիսով, «Ռոբուստա» սուրճի տեսակի արժեքն օգոստոսին աճել է 1,5 անգամ, իսկ «Արաբիկա»-ն՝ 29%-ով։ Բացի այդ, Լոնդոնի բորսայում 4,9%-ով թանկացել են շաքարը, իսկ ամերիկյան շուկայում՝ սոյայի հատիկները։

Նեոդիմը, որն օգտագործվում է մագնիսների արտադրության համար, ամռան վերջին դարձել է աշխարհում ամենաշատ թանկացած մետաղը՝ նրա արժեքն օգոստոսին աճել է 20%-ով։ Լիթիումի գինն աճել է 9,2%-ով, իսկ մոլիբդենինը, որն անհրաժեշտ է համաձուլվածքներ և կատալիզատորներ ստեղծելու համար,՝ 7,7%-ով։

Միևնույն ժամանակ, օգոստոսին աշխարհում ամենաէժանացած ապրանքը դարձել է փայտանյութը, որի գինը նվազել է 19,2%-ով։ Շատ չի հետ մնացել նաև պղինձը, որի արժեքը նվազել է 18,3%-ով։ Վերջապես, եռյակը եզրափակել է նարնջի հյութը, որն օգոստոսին էժանացել է 13,7%-ով։