Մի քիչ թասիբ, մարդու տեսք ունենալու համար Նիկոլը վաղուց պետք է հրաժարական տար. Արմեն Աշոտյան
Ռազմագերիների հարցը Նիկոլ Փաշինյանի համար գոյություն չունեցող հարց է. ԵՄ գրասենյակի առջև մեկ ժամ լուռ ակցիայից հետո լրագրողների հետ զրույցում ասաց ՀՀԿ փոխնախագահ Արմեն Աշոտյանը։
«Այդ հարցն իրեն խանգարում է, խանգարում է իր հեքիաթին, խաղաղության կեղծ դարաշրջանի քարոզչությանը, որովհետև ամեն անգամ, երբ տեսնում ենք Բաքվի և Երևանի բանտերում իրենց քաղաքական պայքարի և կարծիքի համար բանտարկված մեր հայրենակիցներին, Նիկոլ Փաշինյանի հորինված խաղաղությունը փշրվում է հազարավոր բեկորների, և այդ բեկորները որևէ կերպ աղերս չունեն իրենց կողմից մատուցված հեքիաթային իրականության խոստումների հետ»,– ասաց Աշոտյանը։
Ըստ նրա՝ իշխանափոխության դեպքում միանշանակ հնարավորություն կա գերիների ազատ արձակմանը։
«Իմ հայրենակիցները հանկարծ չվարակվեն Նիկոլի կողմից սրսկվող այս հոռետեսությամբ, իբրև թե ոչինչ հնարավոր փոխել հնարավոր չէր։ Ամեն ինչ հնարավոր է փոխել։ Իհարկե՝ ամեն ինչ չէ, որ հնարավոր է հետ բերել, բայց կանխել ՀՀ-ի անկումն ու ջախջախումը հնարավոր է, հետ բերել մեր հայորդիներին Բաքվի բանտերից՝ հնարավոր է, պատասխանատվության կանչել Բաքվի ռեժիմին մարդկության դեմ գործած ոճիրների, էթնիկ զտումների, ցեղասպանության համար՝ հնարավոր է, պատասխանատվության կանչել դավաճաններին, որոնք բերել են այս պատերազմը, երբ Նիկոլ Փաշինյանը սեփական խոստովանական ցուցմունք տվեց, որ բերել է՝ իմանալով, թե ինչ է անում»,– ասաց նա։
