Հրատապ տեսանյութ. ակցիա՝ ԵՄ դեսպանատան մոտ
ՀՀԿ փոխնախագահ Արմեն Աշոտյանը որոշել է միայնակ լուռ բողոքի ակցիա իրականացնել ՀՀճում ԵՄ պատվիրակության շենքի մոտ։
Մինչ ակցիան սկսելը նա ֆեյսբուքյան ուղիղ եթերում տեսանյութ է հրապարակել` նշելով, որ ակցիան նվիրված է Երևանում և Բաքվում պահվող հայ պատանդների և ռազմագերիների, քաղաքական բանտարկյալների ազատությանը։
«Ակցիան լինելու է լուռ, քանի որ ամեն ինչ հայտնի է, ասված է, ամեն ինչից ով որ պետք է` տեղյակ է, և այդ լռության մեջ ոչ թե ասելիքի բացակայությունն է, այլ ցավ, համառություն և մեր պայքարը շարունակելու վճռականություն։ Իսկ թե ինչու եմ միայնակ անում, քանի որ կարծում եմ, որ կարող ենք օրինակ ծառայել, որ այս պաքարը պարտադիր չէ, որ պահանջի հազարավոր միտինգավորներ, պիկետներ, ցույցեր, և այն պետք է իրականացվի յուրաքանչյուր անձի, անհատի մակարդակով, ով հավատարիմ է իր արժեքներին, սիրում է իր հայրենիքն ու չի ուզում ապրել նվաստացած, ինչպես նաև չի անտեսում մեր մյուս հայրենակիցների ողբերգությունը, անազատությունը, կորուստները»,- տեսանյութում ասաց նա։
Նա նաև հավելեց, որ ինքը միայնակ կփորձի ներկայացնել ամբողջ հանրությանը և խնդրեց ըմբոստության այս ձևը դարձնել պայքարի զինանոցի մի մաս` միայնակ դուրս գալով համակարգի դեմ։
«Ինչո՞ւ Եմ պատվիրակության շենքի մոտ։ Քանի որ այն արժեքները, որոնք քարոզվել ու ներկայացվել են որպես ոչ միայն եվրոպական, այլև համամարդկային արժեքներ մեր երկրում տասնամյակներ շարունակ, այսօր անտեսվում են, ոտնահարվում են հենց այն կառույցի կողմից, որը հենց այդ արժեքների ենթադրաբար կրողը պետք է լինի։ Բացի այդ, համապատասխան ճնշումներ չեն գործադրվում պաշտոնական Բրյուսելից ո՛չ Բաքվի ռեժիմի, ո՛չ էլ Երևանի ռեժիմի նկատմամբ, որպեսզի օր առաջ վերադառնան իրենց ընտանիքներ մի քանի տասնյակ հայորդիներ, որոնք նույն պատճառներով պարզապես երկու տարբեր ղեկավարների` Ալիևի ու Փաշինյանի ձեռքերով հայտնվել են բանտերում` իրենց պայքարի, արժանապատվության, ազատության համար գործողությունների արդյունքում»,- հայտարարեց Աշոտյանը։
Նա հայտնեց, որ ակցիայի անցկացման համար առիթ է հանդիսացել այն, որ այսօր Արցախի նախկին նախագահ Բակո Սահակյանի ծննդյան օրն է, որը նա անցկացնում է Բաքվի բանտում։
Ի դեպ, Աշոտյանը ԵՄ գրասենյակի դարպասների ճաղավանդակներին ձեռնաշղթաներով կապված էր։ Նա իր վրա կրում էր երկու մեծ ցուցապաստառ՝ հայ գերիների և պատանդների ազատ արձակման պահանջով։
