Բռնի անհետացումը մարդու իրավունքների վրա ազդող ամենածանր և երկարատև խնդիրներից է. ՄԻՊ
Անհրաժեշտ է համատեղ ջանքեր գործադրել, որպեսզի յուրաքանչյուր անձի ճակատագիրը պարզվի, իսկ նրանց ընտանիքները մշտապես գտնվեն պետության աջակցության և հոգածության ներքո՝ երբեք չմնալով միայնակ։ Բռնի անհետացումների զոհերի միջազգային օրվան նվիրված իր ուղերձում այս մասին նշել է ՀՀ մարդու իրավունքների պաշտպան Անահիտ Մանասյանը։
«Բռնի անհետացումը մարդու իրավունքների վրա ազդեցություն ունեցող ամենածանր և երկարատև խնդիրներից է, որի հետևանքները զգացվում են ոչ միայն հակամարտությունների ժամանակահատվածում, այլ նաև դրանցից հետո՝ շարունակ խաթարելով բռնի անհետացած անձանց և նրանց ընտանիքների խաղաղ ու արժանապատիվ կյանքը»,– ասված է ուղերձում։
Մանասյանը նաև նշել է, որ այս տարիների ընթացքում հավաքագրել, միջազգային տարբեր դերակատարներին և ներպետական իրավասու մարմիններին են ներկայացվել 1990-ականներից, 44-օրյա մարտական գործողություններից մինչև 2023 թ. սեպտեմբերյան իրադարձությունների և ԼՂ–ից հայերի բռնի տեղահանման հետևանքով գտնվելու վայրն անհայտ անձանց ու նրանց ընտանիքների իրավունքների խախտումներին առնչվող խնդիրները՝ բոլորին ուղերձ հղելով, որ այս հարցերն ամենահրատապներից են:
«Որպես մարդու իրավունքների պաշտպան, հատուկ ընդգծում եմ, որ բռնի անհետացման յուրաքանչյուր դեպք ուղղակի ազդեցություն ունի մարդու իրավունքների ողջ համակարգի վրա»,– շեշտել է օմբուդսմանը։
Նրա խոսքով` այս օրվա կարևոր ուղերձներից մեկն էլ պետություններին ուղղված հստակ հիշեցումն է՝ հարգել յուրաքանչյուր ընտանիքի իրավունքը՝ իմանալու ճշմարտությունն իրենց հարազատների ճակատագրերի վերաբերյալ և գործադրել առավելագույն ջանքերը այդ ուղղությամբ։
Մանասյանը համոզված է` միջազգային դերակատարներն էլ իրենց մանդատի շրջանակում պետք է գործադրեն բոլոր հնարավոր ջանքերը՝ աջակցելու ճշմարտության բացահայտմանը և տուժած ընտանիքների իրավունքների լիարժեք վերականգմանն ու պաշտպանությանը։
