«Այդքան երկրներ ճանաչել են հայոց ցեղասպանությունը, եկեք գույքագրենք, թե հայ ժողովուրդը, ՀՀ-ն ի՞նչ են շահել դրանից». Փաշինյան
Ակնհայտ է, որ Նեթանյահուի հայտարարությունը որևէ կապ չունի ոչ ՀՀ-ի ու ոչ ժողովրդի, ոչ հայ ժողովրդի շահերի հետ: Այս մասին լրագրողների հետ ճեպազրույցում հայտարարեց Նիկոլ Փաշինյանը:
«Պետք է հասկանանք՝ ուզո՞ւմ ենք, որ ճանաչումը կամ չճանաչումը լինի աշխարհաքաղաքական մանրադրամ ուրիշների ձեռքում, որը մեր ժողովրդի ու մեր պետության շահերի հետ որեւէ կապ չունի …Ես չեմ ուզում, որ մեր նահատակներին այսպիսի կարգավիճակի մեջ դնենք»,- ասաց Փաշինյանը՝ անդրադառնալով հայոց ցեղասպանության ճանաչման գործընթացի շարունակականությանը։
Հիշեցնենք, որ հաղորդել էինք, որ Նեթանյահուն հայտարարել է, որ ճանաչում է Հայոց ցեղասպանությունը:
Նա նաև հայտարարեց. «Պետք է կենտրոնանանք մեր պետության շահերի վրա: Այդքան երկրներ ճանաչել են հայոց ցեղասպանությունը, եկեք գույքագրենք, թե հայ ժողովուրդը, ՀՀ-ն ի՞նչ են շահել դրանից: Ի՞նչ ենք ստացել դրանից: Մեր նպատակը մեր նահատակներին աշխարհաքաղաքական առեւտրի մեջ որպես վճարամիջոց օգտագործելու հնարավորություն տա՞լն է ուրիշներին»:
Փաշինյանը պատմեց, որ միջազգային գործընկերների հետ է խոսել այս թեմայով, ղեկավարներին հարցրել՝ ինչու են ճանաչում հայոց ցեղասպանությունը, փորձել է հասկանալ ճանաչելու մոտիվացիան.
«Ակնհայտ է՝ դեպքերի մի զգալի մասում այդ մոտիվացիան ընդամենը ընտրություններում 3000, 10.000 կամ 100.000 ձայն ավել ստանալն է: Դա էլ ոչ մի կապ չունի ՀՀ պետական շահերի, Հայաստանի ժողովրդի շահերի հետ: Ընտրությունը եղավ, ձայները ստացվեցին, էլ ի՞նչ դարդ»:
