ԱՄՆ-ն ութ նավ է ուղարկել Լատինական Ամերիկայի ափեր՝ թմրակարտելների դեմ պայքարելու համար
ԱՄՆ-ի ռազմածովային ուժերի հրամանատարությունը ութ նավ է տեղափոխել Կարիբյան ծովի և Խաղաղ օվկիանոսի ջրեր, Կենտրոնական և Հարավային Ամերիկայի ափերին ավելի մոտ՝ թմրակարտելների դեմ պայքարն ուժեղացնելու նպատակով: Այս մասին հաղորդում է The Washington Post-ը։
«Նավերը մասնակցում են թմրանյութերի շրջանառության դեմ ընդլայնված գործողությանը, կանխում են Լատինական Ամերիկայում թմրանյութերի մաքսանենգությունը»,-The Washington Post-ին հայտարարել է ԱՄՆ-ի պաշտպանության նախարարության ներկայացուցիչը։
Թերթի տվյալներով՝ ԱՄՆ-ն ընդհանուր առմամբ հարավ է ուղարկել երեք էսկադրային ականակիր, մեկ հածանավ, երկու դեսանտային նավ, ունիվերսալ դեսանտային նավ և մեկ նավ՝ ափամերձ գոտում գործողությունների համար։ Նավերի վրա գտնվում են առափնյա պահպանության և իրավապահ մարմինների աշխատակիցներ, որոնք թմրանյութերի հայտնաբերման ժամանակ կձերբակալեն կասկածյալների։
