Վանաձորի կայարանի երկաթուղային վագոնային կշեռքը կհանձնվի ՀԿԵ-ին
Վանաձորի կայարանի տարածքում առկա երկաթուղային վագոնային կշեռքը և կշեռքի շինությունը կներառվեն և կշահագործվեն «Հարավկովկասյան երկաթուղի» ՓԲԸ կոնցեսիոն ակտիվների կազմում: Այս մասին համապատասխան որոշումն ընդունվեց ՀՀ կառավարության այսօրվա նիստի ժամանակ։
Նշվում է, որ այդ նպատալով ընկերությունը դիմել է ՀՀ տարածքային կառավարման և ենթակառուցվածքների նախարարությանը։
Քանի որ Վանաձոր քաղաքի կայարանի տարածքում առկա երկաթուղային վագոնային կշեռքը և կշեռքի շինությունը ներկայում չի շահագործվում և գտնվում է ՀՀ պետական եկամուտների կոմիտեի հաշվեկշռում, նախարարությունը դիմել է կոմիտեին` դրանք հանձնելու «Հարավկովկասյան երկաթուղու» շահագործմանը։ Կոմիտեն տվել է իր համաձայնությունը։
«Նախագծով առաջարկվող կարգավորումը թույլ կտա Վանաձոր քաղաքի կայարանի տարածքում առկա երկաթուղային վագոնային կշեռքը և կշեռքի շինությունը վերանորոգումից հետո արդյունավետ շահագործել, ինչպես նաև ապահովել ԱՊՀ անդամ երկրների երկաթուղով բեռնափոխադրումների պահանջների կատարումը»,– ասված է որոշման հիմնավորման մեջ:
Այսպիսով հնարավորություն կստեղծվի իրականացնելու Վանաձորի երկաթուղային կայարանում վագոնների բարձումից հետո դրանց կշռումը, ինչպես նաև կբարձրանա գնացքների անվտանգ երթևեկության ապահովումը:
Այս որոշումն ուժի մեջ մտնելուց հետո ՊԵԿ–ը երկամսյա ժամկետում վագոնային կշեռքը և կշռման սենյակը, ինչպես նաև դրանց տեխնիկական փաստաթղթերը կհանձնի ՏԿԵՆ–ին` շահագործման համար «Հարավկովկասյան երկաթուղի» ՓԲԸ-ին փոխանցելու նպատակով:
