Ձերբակալված կապանցիների մարմնում մարիխուանայով փաթեթներ են հայտնաբերվել
Քրեական ոստիկանության թմրամիջոցների անօրինական շրջանառության դեմ պայքարի վարչությունում ստացված օպերատիվ տեղեկությունն իրացվեց Քրեական ոստիկանության Սյունիքի մարզային և Պետական եկամուտների կոմիտեի մաքսանենգության դեմ պայքարի վարչությունների ծառայողների հետ:
Օգոստոսի 22-ին արտերկրից Հայաստան վերադարձած Կապան քաղաքի բնակչի մարմնում հայտնաբերվեց 4 գրամից ավելի ընդհանուր քաշով մարիխուանայով փաթեթներ:
Նույն համագործակցությամբ նմանատիպ տեղեկություն իրացվեց նաև օգոստոսի 23-ին։ Այս դեպքում ևս իրավապահների օպերատիվ տեսադաշտում արտերկրից ժամանած մեկ այլ կապանցի էր։ 28-ամյա տղամարդու մարմնում հայտնաբերվեցին 16 գրամից ավելի ընդհանուր քաշով մարիխուանայի փաթեթներ:
Երկուսն էլ ձերբակալվել են:
Նախաձեռնվել են քրեական վարույթներ թմրամիջոցի մաքսանենգության հատկանիշներով։
Հանգամանքները նախաքննությամբ պարզվում են։
