Արևի ակտիվ տարածքներն ու բծերը շրջվում են դեպի Երկիր. գիտնականներ
Խոշոր ակտիվ գոտիները և բծերի խմբերը, որոնք Արևի հակառակ կողմում ուժեղ պայթյունների աղբյուր են դարձել, սկսում են դուրս գալ դեպի Երկիր նայող կողմը: Այս մասին հայտնում է Ռուսաստանի գիտությունների ակադեմիայի Տիեզերական հետազոտությունների ինստիտուտի Արեգակնային աստղագիտության լաբորատորիան։
Մասնագետների խոսքով՝ Արևի սկավառակի եզրին արդեն երևում են մագնիսական հանգույցների գագաթները, որոնք աստղի մակերևույթից բարձրանում են մինչև 100-200 հազար կիլոմետր: Այնուամենայնիվ, բծերի խմբերը, որոնցից «աճում են» դրանք, դեռ հորիզոնից այն կողմ են մնում, և դրանց չափերը, ինչպես նաև էներգիայի պաշարները հայտնի չեն։
Վերջին օրերին այդ շրջաններում գրանցվել է բացառիկ բարձր ակտիվություն. տիեզերք են նետվել առնվազն երեք խոշոր հրավիժակներ և պլազմային ամպեր: Բոլորն անցել են Երկրի կողքով և ուղղվել են դեպի Մարս։ Բայց հիմա, քանի որ այդ գոտիները հասնում են Արև-Երկիր գծին, մեր մոլորակի համար ռիսկերը արագ կմեծանան։ Սպասվում է, որ հաջորդ շաբաթվա վերջին դրանք կհասնեն առավելագույնին:
Լաբորատորիան ընդգծում է, որ դեռ պարզ չէ՝ արդյոք այդ ժամանակ նշված հատվածներում կպահպանվեն էներգիայի բավարար պաշարներ, թե դրանք կծախսվեն ավելի շուտ՝ նոր պայթյունների ժամանակ: Այնուամենայնիվ, առաջիկա օրերին ուժեղ բռնկումների ռիսկի մակարդակն ամենաբարձրներից մեկն է այս ամառ: Վերջնական պատկերը գիտնականները նախատեսում են ներկայացնել մի քանի օրից, երբ պարզ կդառնա, թե կոնկրետ որ հետևանքները նշանակալի կլինեն Երկրի համար։
