«Ես պատրաստվում եմ առաջնորդել փոստով քվեարկությունից հրաժարվելու շարժումը». Թրամփ
ԱՄՆ նախագահ Դոնալդ Թրամփը հայտարարել է, որ հրամանագիր կստորագրի 2026 թվականի ԱՄՆ միջանկյալ ընտրություններից առաջ, որն ուղղված կլինի փոստով քվեարկության և «վիճելի» էլեկտրոնային համակարգերի դեմ:
«Ես պատրաստվում եմ առաջնորդել փոստով քվեարկությունից հրաժարվելու շարժումը, ինչպես նաև, քանի խոսում ենք այդ մասին, ծայրահեղ «ոչ ճշգրիտ», շատ թանկ և խիստ վիճելի քվեարկության մեքենաներից, որոնք տասն անգամ ավելի թանկ են, քան ճշգրիտ և բարդ, ջրանիշով թղթե քվեաթերթիկները, որոնք ավելի արագ են աշխատում և վերջում կասկած չեն թողնում, թե ով է հաղթել և ով է պարտվել ընտրություններում»,- գրել է Թրամփը «Truth» սոցցանցում:
Նա նշել է` ԱՄՆ-ն աշխարհում միակ երկիրն է, որն օգտագործում է փոստով քվեարկությունը: Մնացած բոլորը հրաժարվել են դրանից՝ ընտրությունների զանգվածային կեղծումների պատճառով։
«Ես հրամանագիր կստորագրեմ, որպեսզի օգնեմ ապահովել 2026 թվականի միջանկյալ ընտրությունների ազնվությունը»,- ասել է ԱՄՆ նախագահը:
Ավելի վաղ Թրամփը «Fox News» հեռուստաալիքին տված հարցազրույցում հայտնել էր, որ Պուտինն իբր հանդիպման ժամանակ կարծիք է հայտնել ամերիկյան ընտրական համակարգի ոչ կատարյալ լինելու մասին, ինչը հանգեցրել է 2020 թվականի ընտրություններում գործող նախագահի պարտությանը:
