Եթե հյուրանոցներում խավարասերներ լինեն, զբոսաշրջիկներ չեն գա․ Լուկաշենկո

Բելառուսի նախագահ Ալեքսանդր Լուկաշենկոն հանձնարարել է բարելավել երկրում զբոսաշրջային սպասարկումը՝ նշելով, որ եթե հյուրանոցներում սողան խավարասերներ, ապա օտարերկրյա հյուրերը չեն այցելի երկիր: Ինչպես հաղորդում է BelTA լրատվական գործակալությունը, հարցի մասին Լուկաշենկոն բարձրաձայնել է կառավարության անդամների հետ խորհրդակցության ժամանակ:

Բելառուսի ղեկավարի խոսքով՝ զբոսաշրջիկների հոսքը մեծացնելու համար անհրաժեշտ է բարելավել ծառայությունների որակը և հետագայում զարգացնել ոլորտի ենթակառուցվածքները: «Կոպիտ կասեմ. եթե հյուրանոցներում խավարասերները պատերով բարձրանան ու մահճակալների տակ քայլեն, ապա այստեղ զբոսաշրջիկներ չեն գա: Մեզ անհրաժեշտ է այնպիսի մակարդակ, որ բելառուսներն էլ ավելի հաճախ ընտրեն հանգիստն իրենց հայրենի հողում», – ասել է նախագահը:

Լուկաշենկոն հետաքրքրվել է, թե ինչ հստակ տնտեսական ցուցանիշների է կառավարությունը ծրագրում հասնել զբոսաշրջային ոլորտի հնգամյա ծրագրի ավարտին և միջնաժամկետ հեռանկարում: «Հիշեցնեմ, որ հաջորդ հինգ տարիների ընթացքում կառավարությանը հանձնարարվել է զբոսաշրջությունը դարձնել ազգային նախագիծ և առավելագույնս իրացնել դրա տնտեսական ներուժը», – նշել է Լուկաշենկոն:

Քննարկմանն առաջարկվել է Բելառուսում զբոսաշրջության ոլորտի կարգավորողի գործառույթները Սպորտի և զբոսաշրջության նախարարությունից փոխանցել Ազգային զբոսաշրջության գործակալությանը։