Այն մոդելով, որով քանդեց բանակը, հիմա եկեղեցու հիմքերն է քանդում․ Ռոբերտ Քոչարյան
ՀՀ երկրորդ նախագահը Ռոբերտ Քոչարյանը 5-րդ ալիքին տված հարցազրույցում անդրադարձավ բանակի հրամանատարության հեղինակազրկման հարցին և նշեց՝ հենց դա բերեց մարտունակության անկման և պատերազմում ցավալի պարտության։
«ՀՀ իշխանությունների նախաձեռնած արշավն ուղղակի հարձակում է եկեղեցու, այլ ոչ վեհափառի վրա: Նա նույն մեթոդը կիրառեց 2018 թվականից բանակը կազմաքանդելու համար, հիմա գործի է դրվել եկեղեցու հիմքերը քանդելու նպատակով։ «Երկար եմ մտածել ու չեմ հասկացել, թե կուսակրոնության ուխտն ինչ կապ ունի երկրի անվտանգության հետ»,- ասաց ՀՀ երկրորդ նախագահը։
Նա հիշեցրեց՝Փաշինյանը հո չէ՞ր ասում, որ հայկական բանակն է վատ բանակ, ասում էր՝ այս գեներալիտետը քանդում է բանակը։
«Վերջում ինչ ստացանք՝ հրամանատարության նկատմամբ վստահության կորուստը բանակը թուլացրեց այնպես, որ ունեցանք խայտառակ պարտություն պատերազմի ժամանակ։ Մենք չպիտի պարտվեինք, Ադրբեջանն այդ առավելությունը չուներ, վստահաբար եմ ասում, ինքը բանակը բարելավելու կարգախոսների տակ քանդեց բանակը։ Հիմա նույնն անում է եկեղեցու հետ։ Ասում է՝ ես հավատացյալ եմ, Ավետարանից մեջբերումներ է անում, տպավորություն է ուզում ստեղծել, որ ինքը կապ ունի Հիսուսի հետ:
Բայց նույն մոդելով, ինչով քանդել է բանակը, որովհետև բանակում հրամանատարի նկատմամբ անվստահությունը բերում է մարտունակության քայքայման, հիմա ստեղծում է անվստահություն վեհափառի և սրբազանների նկատմամբ ու դրանով արդեն իսկ քանդում է եկեղեցու հիմքերը»,- ասաց ՀՀ երկրորդ նախագահը։
Նա չի կարծում, թե իշխանություններն այս հակաեկեղեցական արշավում հաջողելու են։
Քոչարյանը վստահ է, որ հարձակման դեպքում եկեղեցին կստանա և՛ ժողովրդի, և՛ անգամ իրար չընդունող քաղաքական ուժերի աջակցությունը։
Միաժամանակ վստահ չէ, թե ՀՀ վարչապետ Նիկոլ Փաշինյանի հայտարարած «վեհարանն ազատագրելու» գործողությունը տեղի կունենա։
«Իմ տպավորությունն այնպիսին է, որ իրեն պետք է եկեղեցուն երկարատև վարկաբեկելու գործընթաց»,- ասաց Քոչարյանը։
Քոչարյանը հավանական չի համարում նաև աղանդավորական տարբեր կազմակերպություններին օգտագործելու հավանականությունը, որի մասին գրել էր մամուլը։ Ըստ նրա՝ Փաշինյանն այսօր չունի մոբիլիզացիոն ռեսուրս։
«Չի կարողանալու բավարար թվով մարդ հավաքել իր հայտարարած օպերացիան իրականացնելու համար»,- շեշտեց Քոչարյանը։
