Իսրայելական բանակը Եմենում թիրախավորել է Հոդեյդա նավահանգիստը
Իսրայելական բանակը հայտարարել է, որ հուլիսի 21-ին հարձակվել է Եմենի Հոդեյդա նավահանգստի ներսում գտնվող օբյեկտների վրա՝ հութիների ենթակառուցվածքների վերականգնումը կանխելու պատրվակով։
Այս մասին նշվում է Իսրայելի պաշտպանության բանակի հայտարարության մեջ։
«Իսրայելական բանակը հարվածել և ոչնչացրել է Հոդեյդա նավահանգստում հութիների ահաբեկչական ռեժիմին պատկանող ռազմական ենթակառուցվածքները:
Հարվածներ հասցված ռազմական ենթակառուցվածքների թվում են նավահանգստի ենթակառուցվածքները վերականգնելու համար օգտագործվող ինժեներական տրանսպորտային միջոցներ, վառելիքի տարաներ, Իսրայելի պետության դեմ ռազմական գործողությունների և ուժի կիրառման համար օգտագործվող ռազմածովային նավեր և նավահանգստին հարակից ծովային գոտում գտնվող նավեր, ինչպես նաև հութիների ահաբեկչական ռեժիմի կողմից օգտագործվող լրացուցիչ ահաբեկչական ենթակառուցվածքներ»,- նշվել է հայտարարության մեջ։
Նաև նշվել է, որ նավահանգիստն օգտագործվել է Իրանից զենք փոխանցելու համար, որոնք այնուհետև հութիների կողմից «օգտագործվում են Իսրայելի պետության և նրա դաշնակիցների դեմ ահաբեկչական հարձակումներ իրականացնելու համար»։
Al Jazeera-ի փոխանցմամբ՝ Իսրայելի պաշտպանության նախարար Իսրայել Կացը հայտարարել է, որ Իսրայելը «եռանդուն աշխատում է Եմենում հութիների ենթակառուցվածքների վերականգնման ցանկացած փորձ կանխելու ուղղությամբ»։ Նա շարունակել է՝ սպառնալով, որ Եմենի ճակատագիրն Իրանի ճակատագիրն է՝ խոստանալով, որ հութիները «ծանր գին կվճարեն Իսրայելի վրա հրթիռներ արձակելու համար»։
Իրենց հերթին, հութիներին պատկանող լրատվամիջոցները հաստատել են, որ Իսրայելի կողմից երկրի Հոդեյդա նավահանգստի վրա մի շարք ավիահարվածներ են հասցվել։
Գազայի հատվածում Իսրայելի կողմից սկսած պատերազմի սկզբից ի վեր հութիները՝ Գազային աջակցելու կարգախոսի ներքո, տասնյակ հրթիռային հարձակումներ են իրականացրել և իրականացնում Իսրայելի ուղղությամբ, որն էլ, իր հերթին, հարվածներ է հասցնում Հոդեյդայի և Սանայի վրա։
