«ԱՄՆ-ի կողմից ճանապարհի հսկողությանը դեմ կլինեն ՌԴ-ն և Իրանը. ՀՀ-ում դժգոհությունները պետք է վերածել քաղաքական փոփոխությունների». Գագիկ Հարությունյան
Հուլիսի 11-ին Թուրքիայում ԱՄՆ դեսպան Թոմ Բարաքը ճեպազրույցի ժամանակ լրագրողներին հայտնել է, որ Միացյալ Նահանգներն առաջարկել է վերահսկողության տակ վերցնել Հայաստանի և Ադրբեջանի միջև նախատեսված տրանսպորտային միջանցքը՝ փորձելով առաջ մղել կովկասյան երկու երկրների միջև վաղուց փակուղային դիվանագիտական բանակցությունները: Այս մասին գրել է Middle East Eye–ը։
«Թուրքիան աշխարհի կենտրոնում է: (…) Թուրքիան այդ ամենի կենտրոնում է՝ ինչպես Ադրբեջանն ու Հայաստանը: Նրանք վիճում են 32 կիլոմետր ճանապարհի համար, բայց սա կատակ բան չէ: Սա շարունակվում է մի ամբողջ տասնամյակ՝ 32 կիլոմետրանոց ճանապարհի համար: Եվ ինչ է տեղի ունենում. Ամերիկան գալիս և ասում է. «Լավ, մենք դա կվերցնենք մեզ վրա: Տվեք մեզ 32 կիլոմետրանոց ճանապարհը հարյուր տարվա վարձակալությամբ, և բոլորդ կարող եք օգտվել դրանից»: Բայց այս ցեղային մտածողությունը չի վերանում: Մենք հասել ենք «e pluribus unum» կոչվող իրավիճակի: Ի՞նչ է սա նշանակում: Սա նշանակում է հրաժարվել զանգվածներից մեկի համար: Դա կա Ամերիկայում: Դա չկա այնտեղ: Այնտեղ առաջնայինը, նախ անհատն է, ընտանիքը, ցեղը և հետո նոր ազգը: Բայց ես հույս ունեմ, որ ժամանակի ընթացքում այս «e pluribus unum»-ը կտարածվի, և մենք լատիներենից կանցնենք արաբերենի, արաբերենից՝ ռուսերենի, ռուսերենից՝ չինարենի. գուցե հնարավորություն կա»,- հայտարարել էր նա։
Օրերս էլ ՀՀ արտաքին գործերի փոխնախարար Մնացական Սաֆարյանը «Ազատության» հետ հարցազրույցում ասել էր, որ «Սկզբունքների պահպանման դեպքում Հայաստանը դեմ չէ Սյունիքի ճանապարհի արտապատվիրակմանը»:
Երեկ Նիկոլ Փաշինյանի խոսնակ Նազելի Բաղդասարյանը «Արմենպրեսին» ասել էր, որ «Հայաստանը չի քննարկել և չի քննարկում որևէ երրորդ կողմի սեփական ինքնիշխան տարածքի նկատմամբ վերահսկողությունն արտապատվիրակելը: ՀՀ տարածքի որեւէ հատված չի կարող լինել ՀՀ տարածքային ամբողջականությունից, ինքնիշխանությունից, իրավազորությունից դուրս»։
Ցանցային հետազոտությունների ինստիտուտի տնօրեն, քաղաքագետ Գագիկ Հարությունյանի խոսքով՝ եթե ՀՀ իշխանությունը երկրի ինքնիշխանությունը հանձնում է այլ երկրի, ապա նման քայլ անելու դեպքում առաջինը կարձագանքեն Իրանը և Ռուսաստանը։
«Կարծում եմ՝ սա զուտ քարոզչական բնույթ է կրում, մենք ապրում ենք տեղեկատվական պատերազմի դարաշրջանում և սա ավելի շուտ տեղեկատվական հայտարարություն է Միացյալ Նահանգների կողմից և ոչ ավելին։ Տեղեկատվական պատերազմի նոր միջոց է, աղմուկ բարձրացնելու համար, ինչը հաջող կերպով կիրառում է Թրամփը
Ինքս այս վարչակազմից ամեն ինչի սպասում եմ, նույնիսկ եթե գնան այդ քայլին, ապա հնարավոր փոփոխությունների դեպքում հնարավոր կլինի հրաժարվել այդ փաստաթղթից, որը կվերաբերվի այդ, այսպես կոչված՝ վարձակալությանը»,- 168.am-ի հետ զրույցում նշեց Գագիկ Հարությունյանը։
Նա հիշեցրեց, որ Թրամփն իր խոստումների մեծ մասը չի կատարել, օրինակ, խոստացել էր, թե հայտարարություն կանի, թե ինչպես պետք է պատժի Ռուսաստանին, եթե չհամաձայնվի «խաղաղության պայմանագիր» կնքել Ուկրաինայի հետ, սակայն որևէ քայլ դրան չհետևեց։
«Իրանը կատեգորիկ է արատահայտվել նման ծրագերի կապակցությամբ, նրան ձեռնտու չէ, դա նշանակում է Միացյալ Նահանգների ներկայություն ՀՀ-ում։ Կարծում եմ՝ նման հայտարարությունները կարող են հիմք հանդիսանալ, որպեսզի Ռուսաստանն ավելի ակտիվ աշխատի Հարավային Կովկասում»,- շեշտեց քաղաքագետը։
Նա ընդգծեց՝ հայ ժողովուրդը պետք է նման հայտարաությունների կապակցությամբ արտահայտի իր դժգոհությունը և փորձի դիմադրել, որպեսզի հնարավոր չլինի նման ծրագրի իրագործումը։
«Ինքս այս պահին մեծ հույսեր եմ կապում, որ Սամվել Կարապետյանը գուցե կարողանա կազմակերպել նման դիմադրությունը։ Բոլորը դժգոհ են, արտահայտում են իրենց դժգոհությունը, բայց դրանից որևէ բան չի փոխվում։ Այս դժգոհությունները պետք է վերածել քաղաքական փոփոխությունների։ Օրինակ, հուլիսի 4-ի հավաքը խելացի էր կազմակերպված, պետք է սպասել՝ հասկանալու համար, թե այդ ամենն ինչ շարունակություն է ունենալու»,- ընդգծեց Գագիկ Հարությունյանը։
