Ադամին պատվիրանը տրված ժամանակ Եվան ստեղծվա՞ծ էր
Ստեղծված էր, և պատվերը երկուսի համար տրվեց: Բայց Ադամը իմաստուն և կնոջ վրա գերիշխան լինելով՝ պատվիրանը նրան տրվեց: Ադամը պարտավոր էր ուշադիր լինել, որ Եվան պատվիրանին հակառակ չգործեր, նույնպես Եվան պարտավոր էր Ադամի կողքից չհեռանալ, որի պատճառով էլ Դրախտում մենակ շրջելու ժամանակ խաբվեց:
Եվ եթե Ադամը նրան հանդիմանելով չլսեր նրան, ոչ մի վնաս չկար, ինչպես որ Եվայի կերած ժամանակ մերկ լինելը չզգացին, չմերկացան, սակայն Ադամի ուտելուն պես մերկ լինելը իմացան (Ծննդ Գ 7):
Շատ մեծ խոհեմություն է հարկավոր կանաց սեռին կառավարելու համար, որովհետև եթե նրանց իրենց ցանկությանը թողնես, շատ անգամներ անվայելուչ ընթացքի և վարքի հակվելով՝ իրենց և ուրիշների դժբախտության պատճառ են լինում:
Պողոս եպս. Ադրիանուպոլսեցի, «Զանազանութիւն հինգ դարուց», Հատոր Ա, Վաղարշապատ, 1902
