ԱՄՆ նախագահը կոչ է արել ակտիվացնել անօդաչու սարքերի գնումները
Միացյալ Նահանգների նախագահ Դոնալդ Թրամփն արձանագրելով, որ ժամանակակից հակամարտություններում անօդաչու սարքերը փոխարինում են զենքի շատ տեսակների՝ ընդգծել է դրանց բարձրորակ տեսակների գնման անհրաժեշտությունը: Այս մասին նա հայտարարել է The New York Post-ին տված հարցազրույցում:
«Գնել ավելի շատ անօդաչու սարքեր, շատ և առավել լավը»,- նշել է նա՝ պատասխանելով այն հարցին, թե ինչպես պետք է վարվեն զինվորականները հակամարտություններում անօդաչու սարքերի զանգվածային օգտագործման պայմաններում։
Թրամփը «անօդաչու սարքերի պատերազմ» է որակել Ուկրաինայում հակամարտությունը, որում նշված սարքերի օգտագործումն, ըստ նրա, այժմ ուսումնասիրում են բոլորը:
ԱՄՆ նախագահը համաձայնել է այն կարծիքին, որ անօդաչու սարքերն անվտանգության սպառնալիք են, սակայն, Միացյալ Նահանգներում դրանց օգտագործումն անհնար է արգելել:
Թրամփի գնահատմամբ, ոչ ոք չէր մտածում, որ անօդաչու սարքերը կարող են այն աստիճանի բեկումնային մշակում դառնալ, որ զորքերում կփոխարինեն շատ զինատեսակներ, այդ թվում՝ ինքնաթիռներին։
