Վլադիմիր Կարապետյանն իր հավատարմագրերի պատճենն է հանձնել Մալթայի ԱԳ նախարարին
Իտալիայում և համատեղության կարգով Սան Մարինոյում ու Մալթայում Հայաստանի Հանրապետության դեսպան Վլադիմիր Կարապետյանը հունիսի 10-ին իր հավատարմագրերի պատճենն է հանձնել Մալթայի Հանրապետության փոխվարչապետ, արտաքին գործերի և զբոսաշրջության նախարար Իեն Բորջին:
Այս մասին նշված է Իտալիայում ՀՀ դեսպանության տարածած հաղորդագրության մեջ։
Նշվում է, որ շնորհավորելով դեսպանին Մալթայի Հանրապետությունում իր դիվանագիտական առաքելության մեկնարկի կապակցությամբ՝ փոխվարչապետ Իեն Բորջը հաջողություն է մաղթել դեսպան Կարապետյանին՝ վստահություն հայտնելով, որ նրա գործունեությունը նոր լիցք և բովանդակություն կհաղորդի երկկողմ հարաբերություններին։
Դեսպան Վլադիմիր Կարապետյանն, իր հերթին, շնորհակալություն հայտնելով ջերմ ընդունելության և բարի մաղթանքների համար, հավաստիացրել է, որ ձգտելու է անել առավելագույնը՝ նոր մակարդակի հասցնելու ՀՀ-ՄՀ քաղաքական երկխոսությունը, ինչպես նաև ընդլայնելու երկկողմ փոխգործակցությունը տնտեսական, մշակութային, զբոսաշրջային և մի շարք այլ բնագավառներում։
Հաղորդվում է, որ հանդիպման ընթացքում զրուցակիցներն անդրադարձել են երկկողմ օրակարգային, ինչպես նաև միջազգային հարթակներում հայ-մալթայական փոխգործակցության հարցերին: Մտքեր են փոխանակվել նաև Հարավային Կովկասի տարածաշրջանում խաղաղության հաստատմանն ուղղված ջանքերի շուրջ:
