Հայաստանն ու Կիպրոսը կիսում են նույն արժեքներն ու սկզբունքները. Անիտա Դիմիտրիու
Կիպրոսի Ներկայացուցիչների պալատի նախագահ Անիտա Դիմիտրիուն վերահաստատեց հայ-կիպրական բարեկամական հարաբերությունների բարձր մակարդակը և պատրաստակամությունը՝ դրանք էլ ավելի խորացնելու։ «Այսօրվա մեր հանդիպումը ևս մեկ անգամ ապացույց է մեր երկու երկրների միջև գերազանց հարաբերությունների մասին, և այլ կերպ չէր էլ կարող լինել, քանի որ Հայաստանը մեր սրտում է»,-ԱԺ-ում տեղի ունեցած մամուլի ասուլիսի ժամանակ ընդգծեց Կիպրոսի խորհրդարանի նախագահը։
Անիտա Դիմիտրիուն իր խոսքում անդրադարձավ նաև Հայաստանում իրականացվող հանդիպումներին ու այցերին՝ հատկապես նշելով Արագածոտնի մարզ կատարած այցի տպավորիչ և հուզիչ պահերը, որտեղ պատվիրակությունը հանդիպել է Լեռնային Ղարաբաղից բռնի տեղահանված քաղաքացիներին։
«Մենք կիսում ենք նույն արժեքները, նույն սկզբունքները և տարիներ շարունակ պայքարում ենք նույն արդարության համար։ Այցի շրջանակում տեսանք մարդկանց, որոնք նորովի են փորձում կառուցել իրենց կյանքը։ Մենք մեր կողմից պատրաստ ենք աջակցել վերականգնման այդ ճանապարհին», – ասաց Դիմիտրիուն։ Կիպրոսի խորհրդարանի ղեկավարը բարձր գնահատեց նաև եռակողմ ձևաչափով՝ Կիպրոս–Հունաստան–Հայաստան համագործակցությունը, նշելով, որ այն պետք է շարունակի խորանալ։ Նա ընդգծեց նաև միջազգային կառույցների կողմից հավասար և անկողմնակալ մոտեցման անհրաժեշտությունը։
«Եվրոպան և միջազգային կառույցները չպետք է առաջնորդվեն երկակի ստանդարտներով։ Մենք պետք է չմոռանանք, թե ինչ է տեղի ունեցել Հայաստանում։ Պետք է ունենանք հստակ արձագանք՝ հիմնված արդարության վրա»,- ասաց Դիմիտրիուն։
ԱԺ նախագահների հանդիպման ընթացքում քննարկվել են նաև տարածաշրջանային անվտանգության և հակամարտությունների շուրջ առկա մտահոգությունները։
