200 միլիոն դրամի մեկ անձից գնում են կատարել
Կառավարության ապրիլի 10-ի նիստում գործադիրը հավանություն տվեց մի նախագծի, որով հերթական անգամ միլիոնավոր դրամների մեկ անձից գնում կատարվեց կոնկրետ մեկ ընկերությունից։
Եվ այսպես, թեև ամիսներ անց՝ հուլիսի 20-26-ը, տեղի է ունենալու «Սևան Ստարտափ Սամմիթ 2025» միջոցառումը, սակայն Բարձր տեխնոլոգիական արդյունաբերության նախարարությունում որոշել են, որ կարիք չկա մրցույթ հայտարարել և այդ միջոցառման կազմակերպման համար 200 միլիոն դրամի մեկ անձից գնում կկատարեն «Ստարտափ Արմենիա» գիտակրթական հիմնադրամից։
ԲՏԱ նախարարությունը 200 միլիոն դրամի մեկ անձից գնման պայմանագրի կնքումը պայմանավորել է «Ստարտափ Արմենիա» հիմնադրամի բացառիկությամբ։
Թե ինչո՞ւ է Բարձր տեխնոլոգիական արդյունաբերության նախարար Մխիթար Հայրապետյանը որոշել, որ պետական բյուջեից 200 միլիոն դրամ պետք է հատկացնել հենց այս հիմնադրամին՝ «Սևան Ստարտափ Սամմիթ 2025» միջոցառումը կազմակերպելու համար, երբ ամենամյա այդ միջոցառումը նախորդ տարիներին կազմակերպվել է առանց պետական բյուջեից գումարներ հատկացնելու ճանապարհով, Հայրապետյանի ղեկավարած նախարարությունը չի հիմնավորել։
Ավելին՝ 200 միլիոն դրամը բյուջեից տալու են մի կազմակերպության, երբ հայտնի չեն իրավական հիմքերը (կնքված հուշագիր, պայմանագիր, հանձնարարական և այլն), և ի՞նչ սկզբունքով է իրականացվելու աջակցությունը։
Բացակայում են պահանջվող գումարի հաշվարկ-հիմնավորումները:
Նշենք, որ այս 200 միլիոն դրամը կրճատում են 2025 թվական բյուջեով նախատեսված այլ ծրագրի բյուջեից, և հայտնի չէ նաև, թե այդ այլ ծրագիրը կյանքի կոչելու համար անհրաժեշտ գումարներն ինչպես են համալրվելու։
