Իրանը սպառնացել է դադարեցնել համագործակցությունն ԱԷՄԳ-ի հետ և վտարել նրա տեսուչներին
Իրանը կդադարեցնի համագործակցությունն Ատոմային էներգիայի միջազգային գործակալության (ԱԷՄԳ) հետ և երկրից կվտարի գործակալության բոլոր տեսուչներին, եթե ԱՄՆ-ն և Իսրայելը շարունակեն ռազմական ուժով սպառնալ Իսլամական Հանրապետությանը։
Այս մասին X-ի հարթակում գրառում է կատարել Իրանի գերագույն առաջնորդ այաթոլլա Ալի Խամենեիի քաղաքական հարցերով խորհրդական, Իսլամական հեղափոխության պահապանների կորպուսի գեներալ Ալի Շամխանին։
«Իրանի վրա արտաքին սպառնալիքների շարունակությունը և ռազմական հարձակման իրավիճակի մեջ դնելը կարող է հանգեցնել կանխարգելիչ միջոցների կիրառման, ինչպիսիք են Ատոմային էներգիայի միջազգային գործակալության տեսուչների վտարումը և նրա հետ համագործակցության դադարեցումը։
Օրակարգում կարող է լինել նաև հարստացված (ուրանի) նյութերի տեղափոխումը Իրանի անվտանգ, չբացահայտված վայրեր», – գրել է Շամխանին:
Մեկ այլ գրառման մեջ նա նշել է, որ Իրանի խաղաղ միջուկային ներուժը ամբողջական շղթա է «հանքից մինչև վերջնական արդյունք»։
«Այն ոչ միայն գիտական նվաճում է, այլ նաև կենսական կարևոր գործոն բժշկության, էներգետիկայի, գյուղատնտեսության և շրջակա միջավայրի համար: Այս ազգային տեխնոլոգիան կայունացված, անշրջելի և անխորտակելի է», – գրել է նա:
Ավելի վաղ ԱՄՆ նախագահ Դոնալդ Թրամփը հայտարարել էր, որ անհրաժեշտության դեպքում ռազմական ուժ կկիրառի Իրանի նկատմամբ, ընդ որում, հարձակման մեջ Իսրայելը «մեծապես ներգրավված կլինի»։
