Թուրքիայի փոխնախագահը գնահատել է ամերիկյան մաքսատուրքերի հետ կապված իրավիճակը
ԱՄՆ-ի նախագահ Դոնալդ Թրամփի հայտարարած մաքսատուրքերը համեմատաբար ձեռնտու են Թուրքիային, և Անկարայի ղեկավարությունը շարունակում է վերահսկել իրավիճակը։
Այդ մասին հայտնել է Թուրքիայի հանրապետության փոխնախագահ Ջևդեթ Յըլմազը։Նշվում է, որ չինացի արտադրողները կարող են իրենց մատակարարումների մի մասը վերահղել դեպի թուրքական շուկա՝ ԱՄՆ-ի կողմից ռեկորդային մաքսատուրքերի ներդրումից հետո։ Կարճաժամկետ հեռանկարում դա, ամենայն հավանականությամբ, կհանգեցնի Թուրքիայում գների անկման, սակայն թուրք արտադրողները կարող են տուժել դրանից։
«ԱՄՆ-ն հայտարարեց նաև թուրքական ապրանքների ներմուծման վրա 10 տոկոս հարկ սահմանելու մասին: Առայժմ դա մեզ ձեռնտու է: Մաքսատուրքերի բարձրացումը ստիպում է այն երկրներին, որոնք ապրանքներ են առաքում ամերիկյան շուկա, ագրեսիվ կերպով մուտք գործել այլ շուկաներ, և մենք պետք է զգույշ լինենք: Մյուս կողմից՝ ապրանքների գները նվազել են, ուստի այս առումով կարելի է խոսել դրական էֆեկտի մասին։ Պետք է հետևել դրական և բացասական կողմերին:
Թրամփի հայտարարած մաքսատուրքերը համեմատաբար ձեռնտու են Թուրքիային։ Պարզ է, որ մենք շարժվում ենք դեպի պրոտեկցիոնիստական աշխարհ։ Մենք գնում ենք դեպի մի ժամանակաշրջան, երբ յուրաքանչյուր երկիր կպաշտպանի իր շահերը»,-ասել է Յըլմազը։
