
Կխելագարվեմ ուղղակի, նամակ են գրում՝ 17 սխալ կա մեջը. Փաշինյան
Երկրում մարդկային ռեսուրսի ճգնաժամ է, որի արդյունքում էլ հենց ՀՀ կառավարությունը սխալ կադրային քաղաքականություն է վարում։ Այդ մասին կառավարության այսօրվա նիստի ժամանակ հայտարարեց Նիկոլ Փաշինյանը։
«Ով առավոտը քնից վեր է կենում, ասում է` ՀՀ կառավարությունը սխալ կադրային քաղաքականություն է վարում… Է հա, քանի որ երկրում մարդկային ռեսուրսի ճգնաժամ է, ու դա նրանից է, որ բնակավայրերի 70 տոկոսից ավելիում մանկապարտեզ չկա»,- հայտարարեց նա։
Նրա խոսքով` երբ մանկապարտեզների կեսից ավելին կիսաքանդ է ֆիզիկական ու բարոյական իմաստով, չի կարող այդտեղ չլինել կադրային սով։
«Հիմա կասեն` ինչ, մեր երկրի անգանդը չորացե՞լ է, չէ, չի չորացել, ժողովուրդ ջան. կա՞ն լավ կադրեր, կան, իհարկե, փոքր խմբով, որոնք 1-10 մլն դրամով աշխատում են ՀՀ-ում, ՀՀ-ից դուրս ու չեն գա աշխատեն ՀՀ կառավարությունում, որ ստանան 400-500.000 դրամ հերիք չի՝ ու ամեն աշխատած կոպեկի հետ էլ մի անեծք տանեն տուն` էլի պարգևավճարը, էլի պարգևավճարը տարան։ Սա շատ լավ տեսարան է։ Սա ուրիշների մասին չէ, այլ մեր մասին է. մենք այդ սրբազանացման վիճակից պետք է դուրս գանք»,- հայտարարեց Փաշինյանը։
Ըստ նրա՝ եթե իրենք ու անգամ՝ կառավարության նախկին ղեկավարները թեստ անցնեն, կտեսնեն, որ իրենք էլ այնքան լավ կադրեր չեն, ու այս հարցում պետք չէ ինքնախաբեությամբ զբաղվել։
«Ու գիտե՞ք՝ դա ինչից է, քանի որ մենք մեքենա քշել չգիտենք, քանի որ մենք վարորդական իրավունք ստացել ենք այնպես, ինչպես ստացել ենք։ Մի մարդ ինձ նամակ է գրել, թե բա ինձ աշխատանք չե՞ք ուզում տալ, նայում եմ տեքստը, 4 նախադասություն է՝ 17 ուղղագրական սխալով։ էս վերջերս չդիմացա, այդպիսի մեկին պատասխանեցի.
«Հարգելիս, նամակ գրելիս, գոնե տեքստիդ նայի, չես գտնո՞ւմ, որ դու քո կրթությամբ պիտի զբաղվես»։
Նա ինձ ջղայնացած հետ գրեց՝ ասելով, թե քո կարծիքով՝ ես կրթություն չունե՞մ, ու տեքստի հետ կցել է դիպլոմը։ Ու նույնիսկ այդ տեքստի մեջ նա էլի բազմաթիվ ուղղագրական սխալներ էր արել։ Ով ուզի, կտանեմ, ցույց կտամ այդ նամակը»,- սրտնեղած նշեց Փաշինյանը։
Նրա խոսքով` 4-5 նախադասություն վարժ ասելու ընդունակությունը դեռ չի նշանակում գիտելիք, նույնիսկ գիտելիք ունենալը չի նշանակում գիտելիք, քանի որ գիտելիք ունենալը մի բան է, այն կիրառելը՝ մեկ այլ բան, գիտելիքը 3-րդ անձին փոխանցելը՝ լրիվ այլ բան։
«Ասածս հնարավոր է չափազանցություն թվալ, սակայն ֆունդամենտալ խնդիրն այդտեղ է, երբ մենք չենք կարողանում ախտորոշել մեր խնդիրը։ Եկեք առերեսվենք այս խնդրի հետ։ Հակառակ դեպքում, այդպես նիհիլիզմի, հուսահատության, դեպրեսիայի մեջ կընկնենք. մենք պետք է օգնենք իրար` խնդրենք, բացատրենք, աղաչենք, ներողություն խնդրենք իրարից ինչքան պետք է»,- ասաց նա
Փաշինյանը տեղեկացրեց, որ ԿԳՄՍ նախարարի հետ այսօր խորհրդակցել են, որ նախապատրաստական դասընթացներ անցկացնեն դպրոցների տնօրենների համար, ու որևէ տնօրենի թույլ չտան թափուր պաշտոնի մրցույթի մասնակցել մինչև այդ դասընթացը չավարտի ու սերտիֆիկատ չստանա։