Հայաստանում գործող բանկերը 2024 թվականին 6,4 տրլն դրամի վարկ են տրամադրել
ՀՀ առևտրային բանկերի կողմից տրամադրված վարկերի ընդհանուր ծավալը 2024 թ. վերջին կազմել է 6,4 տրլն դրամ։ «ՓՄՁ ոլորտի ֆինանսավորման հնարավորություններն ու հեռանկարները» թեմայով համաժողովի ժամանակ այս ցուցանիշը ներկայացրեց Հայաստանի բանկերի միության նախագահ Դանիել Ազատյանը։
Նա հայտնեց, որ 3.1 տրլ դրամի վարկը տրամադրվել է տնտեսությանը և իրավաբանական անձանց, իսկ ՓՄՁ–ներին` 1.6 տրլ դրամ։
Ինչ վերաբերում է միջոցառման համակազմակերպիչ Գերմանա-հայկական հիմնադրամի իրականացրած վարկավորման ծրագրերին, ապա Ազատյանը նշեց, որ 2024 թվականին հիմնադրամը ՓՄՁ-ներին 174 մլրդ դրամի ավելի քան 13.000 վարկ է տվել։
Ի դեպ, հիմնադրամի այս ծրագրի մեկնարկից` 1998 թվականից սկսած ՓՄՁ-ներին տրամադրվել է 880 մլրդ դրամի մոտ 130.000 վարկ։
Ըստ Ազատյանի` միջազգային ֆինանսական հաստատությունների հետ համագործակցությունը մեծ հնարավորություն է ընձեռել հայաստանյան առևտրային բանկերին` ֆինանսական նոր գործիքներ առաջարկելու համար։
«Գլխավոր նպատակն է ապահովել թիրախային ֆինանսավորում և ձևավորել վարկավորման մշակույթ, որտեղ առևտրային բանկերը հանդիսանում են տեղայնացման առանցքային օղակ»,- ընդգծեց նա։
Միության նախագահի խոսքով` իրենք իրենց լիազորությունների շրջանակում պատրաստ են նպաստել հայաստանյան բիզնեսի երկխոսությանը։ Այս նպատակով ՀԲՄ-ն մարզերում նախատեսել է տարբեր ձևաչափերով միջոցառումների շարք անցկացնել։
Նշենք, որ 2023 թ. տվյալներով` ՀՀ-ում կա 53.000 միկրոձեռնարկատեր, որոնց մի մասը զբաղվում է մանրածախ և մեծածախ առևտրով, մյուս մասը սպասարկման ոլորտում է կամ զբաղվում է մշակող արդյունաբերությամբ։
